މާލޭގެ ޓްރެފިކް ތޮއްޖެހުން ކުޑަކުރުމުގެ ގޮތުން "ސްކޫލް ފްރެންޑްލީ" ބަސްތަކެއް ޚިދުމަތަށް ނެރުމުގެ މަސައްކަތް ސަރުކާރުން ކުރަމުންދާ ކަމަށް އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން ކުރިއަށްގެންދިޔަ "އަހާ" ފޯރަމުގައި ވާހަކަފުޅު ދައްކަވަމުންނެވެ.

Ad by Hajj Corporation

ވަޒީރު ސަޢީދު ފާހަގަކުރެއްވި ގޮތުގައި މާލޭގެ މަގުތަކުގެ 82 އިންސައްތަ މިހާރު އޮތީ ވެހިކަލްތަކުން ތޮއްޖެހި ފުރިފައެވެ. އެގޮތުން މާލެ ސަރަހައްދުގައި ރަޖިސްޓްރީ ކޮށްފައިވާ ވެހިކަލްތަކުގެ ޖުމްލަ އަދަދު 130,806 އަށް އަރާއިރު، އޭގެ ތެރޭގައި 14,911 ކާރާއި 115,895 ސައިކަލު ހިމެނެއެވެ. މާލެއަކީ ޖާގަ އިތުރަށް ބޮޑުކުރެވެން ނެތް ތަނަކަށް ވުމުން، ސަރުކާރުގެ މައިގަނޑު އަމާޒަކީ މާލެއަކީ ވެހިކަލް ރަޖިސްޓްރޭޝަން ކޮންޓްރޯލްޑް ޒޯނަކަށް ހަދައި، ވެހިކަލް މަދުކުރުމާއެކު މާސް ޓްރާންސްޕޯޓަށް ބަރޯސާވާ މިންވަރު އިތުރުކުރުން ކަމަށްވެސް ވަޒީރު ވިދާޅުވިއެވެ.

މި މަސައްކަތްތައް ހަރުދަނާކޮށް ކުރިއަށް ގެންދިއުމަށްޓަކައި ޓްރެފިކް މައްސަލަތައް ހައްލުކުރުމަށް ޚާއްސަ މިނިވަން އޮފީހެއް ޤާއިމްކޮށް މިހާރު ޢަމަލީ މަސައްކަތް ފަށާފައިވާކަން ހާމަކުރައްވަމުން ވަޒީރު ވިދާޅުވީ، ޓްރެފިކް ބާރުބޮޑުވާ ވަގުތުތަކަށް ޚާއްސަކޮށްގެން ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހިން މާލެއަށް ދަތުރުކުރާނެ ބަސްތަކެއް ތަޢާރަފްކުރުމަށް ރޭވިފައިވާ ކަމަށެވެ.

"ފޭސް 2 އަދި ފޭސް 1އިން އެކި ބޭނުންތަކަށް މާލެއަށް ވަޑައިގަންނަވާ ބޭފުޅުންނާއި، އަދި މާލެއިން އެކި ބޭނުންތަކަށް ރަޝް އަވާސްތަކުގައި ހުޅުމާލެއަށް ވަޑައިގަންނަވާ ބޭފުޅުންނަށް މި ޕްލޭންގެ ތެރޭގައި ހިމެނޭނެ ފޭސް 2އިން ވެލަނާގެ ސަރަހައްދަށް އަދި ގްރީން ޒޯންތަކަށް ވަކި ގަޑިތަކެއްގައި ދަތުރުކުރާ ބަސްތަކެއް ތައާރަފްކުރުން. އަދި އަޅުގަނޑުމެން މި ގަސްތުކުރަނީ ސްކޫލްތަކަށް ދަތުރުކުރާ ސްކޫލް ފްރެންޑްލީ ބަސްތަކެއް ތަޢާރަފްކުރުމަށްވެސް،" ވަޒީރު ވިދާޅުވިއެވެ.

މީގެ އިތުރުން މާލޭގެ ވަށައިގެންވާ ރިންގް ރޯޑުގެ މަސައްކަތްތައް މިހާރު ނިމުމަކާ ގާތްވެފައިވާ ކަމަށާއި، މަގުތަކުގައި ޓްރެފިކް ލައިޓްތައް ހަރުކުރުމާއި، ފުލުހުންގެ ވިޒިބިލިޓީ އިތުރުކުރުމުގެ އިތުރުން މާސް ޓްރާންސްޕޯޓް މޮބިލިޓީ ޕްލޭންގެ ދަށުން ގިނަ ފިޔަވަޅުތަކެއް އެޅުމަށް ވަނީ ހަމަޖެހިފައެވެ. ވަޒީރު ސަޢީދު ވިދާޅުވީ މި ހުރިހާ މަސައްކަތްތަކަކީވެސް ރައްޔިތުންނަށް އެންމެ ފަސޭހަވާނެ ގޮތަށް ރޭވިގެން ކުރިއަށްދާ ކަންކަން ކަމަށާއި، ކުރިއަށްއޮތް ތިން އަހަރު ދުވަހުގެ ތެރޭގައި މާލޭގެ ޓްރެފިކް މައްސަލައަށް އެދެވޭ ހައްލެއް ލިބިގެންދާނެ ކަމަށް އުންމީދު ކުރައްވާ ކަމަށެވެ.