"ރެޑީ ސެޓް މަޢުރަޒު 26" ގެ ނަމުގައި ކުރިއަށްގެންދިޔަ ޚާއްސަ ހަރަކާތުގެ ތެރެއިން، "ދިވެހިންގެ އުފެއްދުންތެރިކަމުގެ މަޢުރަޒު 2026" ރަސްމީކޮށް އިފްތިތާޙުކޮށްފިއެވެ.

އިޤުތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވުޒާރާއާއި، ބިޒްނަސް ސެންޓަރ ކޯޕަރޭޝަން (ބީސީސީ) ގުޅިގެން ކުރިއަށް ގެންދިޔަ މި ހަރަކާތް އޮތީ ހުޅުމާލެ ފޭސް 1 ގެ ދިރާގު ފަހަތުގައި އޮންނަ ބީޗު ސަރަހައްދުގައެވެ.

Ad by Hajj Corporation

މި ހަރަކާތުގެ ތެރޭގައި މިއަހަރުގެ އެކްސްޕޯ އާންމުންނަށް ފެންނާނެ ގޮތުގެ ނަމޫނާއެއް ދައްކުވައިދޭ ރިވީލިންގ ވީޑިއޯއެއް ވަނީ އާންމުކޮށްފައެވެ. މީގެ އިތުރުން މައުރަޒުގެ ސްޕޮންސަރުންނާއި ޕާޓްނަރުންނާއެކު ރަސްމީކޮށް ސޮއިކުރުމާއި، މައުރަޒުގެ ތެރޭގައި ކުރިއަށްދާނެ ބޮޑުބެރު މުބާރާތާއި ސަޤާފީ ވާދަ މުބާރާތުގައި ބައިވެރިވާ ޓީމުތަކުގެ އިތުރުން އެހެނިހެން ކުޅިވަރު މުބާރާތްތައް ވެސް ވަނީ އިޢުލާންކޮށްފައެވެ.

ސަޤާފީ އަދި ބޮޑުބެރު ހަރަކާތްތަކުގައި ބައިވެރިވާ ޓީމުތަކުގެ ތެރޭގައި އެވޭލާ ބައި އިންކްލިކްސް، އެކްސްޓްރީމް ލެވެލް، ހިޔަލަ، ޕަރޕަލް ވިންގްސް، މާބައިދޫ ކައުންސިލް، ބ. ހިތާދޫ ޔޫތު ވިންގް ޖަމްޢިއްޔާ، އޮމަލަ، ޓީމް މަލަކާ، އަދި އެމް.އެން.ޔޫ ޑާންސް ގްރޫޕް ހިމެނެއެވެ. އަދި ބޮޑުބެރު ގްރޫޕުތަކުގެ ތެރޭގައި އެކަތި، ސާދަ ތިރީސް އަށެއް، އެންދެރި، ރިދަމް، ހޭވައްލާ، ހޭވާލި، މަންނަ، ޗާލޭ، އެމް.އެން.ޔޫ އަދި މަންނަޔަންސް ހިމެނޭއިރު، ނެޓްބޯލް، ކެރަމް، ބާސްކެޓްބޯލް، ބެޑްމިންޓަން އަދި ބަށިބޯޅަ އެސޯސިއޭޝަނުން މި ހަރަކާތްތަކުގައި ބައިވެރިވެއެވެ.

މިއަދު ހަވީރު 4:00 އިން ފެށިގެން ރޭގަނޑު 11:00 އަށް ކުރިއަށްދިޔަ މި އިވެންޓުގައި އާއިލާތަކަށާއި ކުޑަކުދިންނަށް ޚާއްސަ މޫދު ކުޅިވަރުތަކާއި، ބައުންސީ ކާސަލްގެ އިތުރުން، ރޭގަނޑުގެ ވަގުތުގައި ލައިވް މިއުޒިކާއި ބޮޑުބެރުގެ ފޯރިގަދަ ހުށަހެޅުންތައް ވަނީ ދައްކާލާފައެވެ.

"ދިވެހީންގެ އުފެއްދުންތެރިކަމުގެ މައުރަޒު 2026" ބޭއްވުމަށް ހަމަޖެހިފައިވަނީ މި އޮކްޓޯބަރު މަހުގެ 25 އިން ނޮވެމްބަރު މަހުގެ 2 ވަނަ ދުވަހުގެ ނިޔަލަށް ހުޅުމާލެ ސެންޓްރަލް ޕާކުގައެވެ. މި މައުރަޒުގައި 16 ދާއިރާއަކުން 73 ގިންތިއެއްގެ އުފެއްދުންތަކާއި ޚިދުމަތްތައް ދައްކާލާއިރު، ވާދަކުރުމުގެ ބައިގައި 6،000 އަށްވުރެ ގިނަ ދިވެހި އުފެއްދުން ރަޖިސްޓަރީކޮށްފައިވެއެވެ. އަދި މި މައުރަޒުން 1,000 އަށްވުރެ ގިނަ އުފެއްދުންތެރިންގެ އުފެއްދުންތައް ފެނިގެންދާނެއެވެ.