ހޮނިހިރު ދުވަހުގެ ރޭ ވިޔަރެއާލާ ދެކޮޅަށް ކުޅުނު މެޗުގައި ދެއްކި ރަތް ކާޑާ ގުޅިގެން ރެއާލް މެޑްރިޑްގެ ތަރި ވިނީޝިއުސް ޖޫނިއަރއަށް ހަތަރު މެޗުގެ ސަސްޕެންޝަނެއް ކަނޑައަޅައިފިއެވެ. މި އަދަބާއެކު، ބާސެލޯނާއާ ދެކޮޅަށް ކުޅޭ މަޝްހޫރު 'އެލް ކްލެސިކޯ' މެޗުގައި އޭނާއަށް ނުކުޅެވޭނެކަން މިހާރު ވަނީ ކަށަވަރުވެފައެވެ.

މި އަދަބު އޭނާއަށް ދިނީ ވިލިއަމް ސަލީބާގެ އިސްތަށިގަނޑުގައި ހިފުމުންނާއި، އެ ނިންމުމާ ދެކޮޅަށް ދެއްކި ހިތްހަމަނުޖެހުންތަކާ ގުޅިގެންނެވެ. ޑިސިޕްލިނަރީ ކޮމިޓީން ނިންމީ ބޯޅަ ނެތް ވަގުތެއްގައި ހިންގި އެ އަމަލަށް ދެ މެޗުގެ ސަސްޕެންޝަނެއް އަދި ރަތް ކާޑަށް ފަހު ވިނީގެ އަމަލުތައް ހުރިގޮތުން އިތުރު ދެ މެޗުގެ ސަސްޕެންޝަނެއް ދިނުމަށެވެ.

Ad by Hajj Corporation

މި ސަސްޕެންޝަންގެ ސަބަބުން ލަލީގާގައި ސެވިއްޔާ، ކޭމްޕް ނޯގައި ބާސެލޯނާ، ރޭސިންގ ސަންތަންދޭރު އަދި ވެލެންސިއާއާ ދެކޮޅަށް ކުޅޭ މެޗުތައް ވިނީޝިއުސްއަށް ގެއްލޭނެއެވެ. އެހެންކަމުން، ކުރިއަށް އޮތް އިންޓަނޭޝަނަލް ބްރޭކަށް ފަހު ނޮވެމްބަރު 20 އިން 23 އަށް ސެލްޓާއާ ދެކޮޅަށް ކުޅޭ މެޗާ ހަމައަށް، އެއް މަހަށް ވުރެ ގިނަ ދުވަހު އޭނާއަށް ލީގުގައި ނުކުޅެވޭނެއެވެ. އެންމެ އަވަހަށްވެސް ދެން ރެއާލްގެ ޖޯޒީގައި ވިނީ ފެންނާނީ އަންނަ މަހުގެ 22 ގައެވެ.

ރެއާލް މެޑްރިޑުން ދެކޭގޮތުގައި މިއީ އިންސާފުވެރި ނޫން އަދި މާ ބޮޑު އަދަބެކެވެ. މިއީ ރެފްރީންނާއި ޑިސިޕްލިނަރީ ކޮމިޓީތައް ހިމެނޭހެން މުޅި ނިޒާމު އޮތް ގޮތް ހާމަކޮށްދޭ ނިންމުމެއް ކަމަށް އެ ކްލަބުން ގަބޫލުކުރެއެވެ.