ކޮންމެ އަހަރެއްގެ އޮކްޓޫބަރު މަހުގެ 15 ވަނަ ދުވަހަކީ ދިވެހިރާއްޖޭގައި ދަނޑުވެރިންގެ ދުވަހުގެ ގޮތުގައި ފާހަގަކުރާ ދުވަހެވެ. މި ދުވަސް ފާހަގަކުރުމުގެ މައިގަނޑު ބޭނުމަކީ ގައުމީ ފެންވަރުގައި ކާބޯތަކެތީގެ ރައްކާތެރިކަން ކަށަވަރުކުރުމަށާއި، އިގުތިސާދު ސިންދަފާތު ކުރުމަށްޓަކައި ހީވާގި ދިވެހި ދަނޑުވެރިން އަދާކުރާ މުހިންމު ދައުރުގެ އަގުވަޒަންކޮށް، އެފަރާތްތަކުގެ މަސައްކަތް ފާހަގަކުރުމެވެ.

ޝައްކެއް ނެތް ގޮތުގައި ރާއްޖެއަކީ ކާބޯތަކެތީގެ ބޮޑު ބަޔަކަށް ބޭރު ގައުމުތަކަށް ބަރޯސާވާ ގައުމަކަށްވާތީ، ދުނިޔޭގެ ބާޒާރަށް އަންނަ ލޮޅުންތަކާއި ދަތުރުފަތުރުގެ ދަތިތަކުގެ އަސަރު ރާއްޖެއަށް ވަރަށް ބޮޑަށް ކުރެއެވެ.

Ad by Hajj Corporation

އެހެންކަމުން، ގައުމީ ފުދުންތެރިކަން ކަށަވަރުކުރުމަށްޓަކައި ދަނޑުވެރިކަމަކީ ކޮންމެހެން ބޭނުންވާ މުހިންމު ސިނާއަތެކެވެ. ބޭރުގެ ޤައުމުތަކަށް ބަރޯސާވާ މިންވަރު ކުޑަކޮށް، އަމިއްލަ ފަސްގަނޑުގައި ކާބޯތަކެތި އުފެއްދުމަކީ ސީދާ ގައުމުގެ މިނިވަންކަމާއި އިސްތިގުލާލާ ގުޅިފައިވާ ކަމެކެވެ.

ދިވެހި ދަނޑުވެރިންނަށް މިއަދު ދިމާވެފައިވާ އެންމެ ބޮޑެތި ގޮންޖެހުންތަކުގެ ތެރޭގައި، ބިން ކުޑަވުމާއި، ފަސްގަނޑުގެ އޮނިގަނޑު ދަށްވުމުގެ އިތުރުން މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ގޮންޖެހުންތައް ހިމެނެއެވެ. ނަމަވެސް، މި ކަންކަމަށް ޒަމާނީ ޓެކްނޮލޮޖީގެ އެހީގައި ހައްލު ހޯދުން ވަނީ އިތުރުވެފައެވެ. އެގޮތުން، ޖާގަ ކުޑަ ތަންތަނުގައި ހައިޑްރޯޕޮނިކްސް އަދި ވަޓިކަލް ފާމިންގް ފަދަ ޒަމާނީ ނިޒާމުތައް ބޭނުންކުރުމާއި، ތިމާވެށްޓާ ރައްޓެހި އޯގަނިކް އުސޫލުތައް ގެންގުޅުމާއި، އަދި ދަނޑުވެރިކަން ކުރުމުގައި ސްމާޓް އެގްރިކަލްޗާގެ ވަސީލަތްތައް ބޭނުންކުރުން ފަދަ ކަންކަން ފާހަގަކޮށްލެވެއެވެ.

ސަރުކާރުގެ މައިގަނޑު ސިޔާސަތަކީ ރާއްޖޭގައި އާންމުކޮށް ހައްދައި އުޅޭ އަދި ގިނައިން ބޭނުންކުރާ ބައެއް ބާވަތްތައް (އުނދަގުލެއްނެތި ހެއްދޭ މޭވާއާއި ތަރުކާރީ) އިމްޕޯޓްކުރުން މަދުކޮށް، އެ ތަކެތި އަމިއްލައަށް އުފެއްދޭނެ މަގު ފަހިކޮށްދިނުމެވެ. މީގެ އިތުރުން ދަނޑުވެރިންނަށް ބޭނުންވާ މާލީ އެހީތެރިކަމާއި، ތަމްރީނު އަދި އުފެއްދުންތައް ބާޒާރަށް ނެރެ ވިއްކޭނެ ފަސޭހަ ނިޒާމުތައް ގާއިމުކުރުމުގެ މަސައްކަތްތައް ދަނީ ކުރެވެމުންނެވެ.