ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޕާކިސްތާނަށް ކުރައްވާ ފުރަތަމަ ރަސްމީ ދަތުރުފުޅުގައި، މި މަހުގެ 20 އިން 22 އަށް އެ ޤައުމަށް ވަޑައިގަތުމަށް ވަނީ ހަމަޖެހިޖެ އެވެ.

މިއީ 2015 ވަނަ އަހަރުގެ މެއި މަހު އޭރުގެ ރައީސް ޢަބްދުﷲ ޔާމީން ޢަބްދުލްޤައްޔޫމް ޕާކިސްތާނަށް ކުރެއްވި ދަތުރުފުޅަށްފަހު، ރާއްޖޭގެ ވެރިއަކު އެ ޤައުމަށް ވަޑައިގަންނަވާ ފުރަތަމަ ފަހަރެވެ. މި ދަތުރުފުޅުގައި ރައީސްގެ އަރިހުގައި ސަރުކާރުގެ ވަޒީރުން ހިމެނިވަޑައިގަންނަވާ މަތީ ފަންތީގެ ވަފުދެއް ބައިވެރިވެވަޑައިގަންނަވާނެއެވެ.

Ad by Hajj Corporation

އިސްލާމްއާބާދުގައި ކުރިއަށްދާ މި ދަތުރުފުޅުގައި، ޕާކިސްތާނުގެ ބޮޑުވަޒީރު ޝެހްބާޒް ޝަރީފާއި އެ ޤައުމުގެ ރައީސް އާޞިފް ޢަލީ ޒަރުދާރީއާ ރައީސް މުޢިއްޒު ބައްދަލުކުރެއްވުމަށް ވަނީ ރޭވިފައެވެ. ރަސްމީ ފެންވަރުގައި ބާއްވާ މި މަޝްވަރާތަކުގައި ދެ ޤައުމުގެ ގުޅުން އިތުރަށް ބަދަހިކުރުމުގެ އިތުރުން، ސަރަޙައްދީ މަސްލަޙަތުތަކާއި، ސާކް ޖަމްޢިއްޔާ އަލުން ހަރަކާތްތެރިކުރުމާ ގުޅޭގޮތުން މަޝްވަރާކުރައްވާނެއެވެ. އަދި އދ. އާއި އޯއައިސީ ފަދަ ބައިނަލްއަޤްވާމީ މައިދާންތަކުގައި ދެ ޤައުމު ގުޅިގެން މަސައްކަތްކުރުމާ މެދުވެސް ޚިޔާލު ބަދަލުކުރާނެއެވެ.

 މި ދަތުރުފުޅުގެ އެންމެ ފާހަގަކޮށްލެވޭ އެއް ކަމަކީ، ދެ ޤައުމުގެ މެދުގައި އެކި ދާއިރާތަކުން 12 ވަރަކަށް އެއްބަސްވުމެއްގައި ސޮއިކުރުމަށް ތައްޔާރުވަމުން ދިޔުމެވެ. އޭގެ ތެރޭގައި، ރާއްޖެއާއި ޕާކިސްތާނާ ދެމެދު ސީދާ ވައިގެ ދަތުރުތައް ފެށުމާއި، ސިއްހީ ދާއިރާއާއި މަތީ ތައުލީމާއި ދިރާސާގެ ދާއިރާއިން އެއްބާރުލުން ދިނުނުމުގެ އިތުރުން ދިފާއީ ދާއިރާއިން ގުޅުން ބަދަހިކުރުމުގެ އެއްބަސްވުމެއް ހިމެނެ އެވެ.

މީގެ އިތުރުން މާލީ ދާއިރާ، ޓެކްނޮލޮޖީ، މަޖިލިސްތަކުގެ ގުޅުން، ފަތުރުވެރިކަން، މޫސުމީ ބަދަލުތައް އަދި މީޑިއާގެ ދާއިރާއިން ވެސް ގުޅުން ބަދަހިކުރުމުގެ މުހިންމު އެއްބަސްވުންތަކެއްގައި ސޮއިކުރުމަށް ވަނީ ހަމަޖެހިފައެވެ.