ރާއްޖޭގެ މާލީ ހާލަތުން އަރައިގަތުމަށް ސަރުކާރުން ކުރަމުންދާ މަސައްކަތްތައް ބައިނަލްއަޤްވާމީ މާލީ އިދާރާ، އައިއެމްއެފް އަދި ވޯލްޑް ބޭންކުން ބަލައިގަނެފި އެވެ.

މިކަން ހާމަކޮށްފައިވަނީ ތައިލޭންޑްގެ ބެންގްކޮކްގައި ކުރިއަށްދާ އެ ދެ އިދާރާގެ އަހަރީ ބައްދަލުވުމުގެ ހަވާސާގައި، ފިނޭންސް މިނިސްޓަރު ހަސަން ޒަރީރުއާ އެކު ބޭއްވެވި ވަކިވަކި ބައްދަލުވުންތަކުގައެވެ. ފިނޭންސް މިނިސްޓަރު ވަނީ ފުރަތަމަ އައިއެމްއެފްގެ އެގްޒެކެޓިވް ޑިރެކްޓަރ ޑރ. މުޙައްމަދު މާއިތުއާ އަދި ދެން ވޯލްޑް ބޭންކުގެ އެގްޒެކެޓިވް ޑިރެކްޓަރ އަބްދުލްޢަޒީޒް އަލް މުއްލާއާ ބައްދަލުކުރައްވައި، މާލީ ހާލަތު ރަނގަޅުކުރުމަށް ކުރަމުންދާ މަސައްކަތްތަކާ ގުޅޭގޮތުން މަޝްވަރާކުރައްވާފައެވެ.

Ad by Hajj Corporation

މި މަސައްކަތްތަކުގެ ނަތީޖާއެއްގެ ގޮތުން، ރާއްޖެއިން އަދާކުރަންޖެހޭ ދަރަނިތައް ޤަވާއިދުން ދައްކަމުންދާތީ، ބައިނަލްއަޤްވާމީ ކްރެޑިޓް ރޭޓިން އޭޖެންސީތަކުން ވަނީ ރާއްޖޭގެ ރޭޓިން މައްޗަށް ޖައްސާފައެވެ. އެގޮތުން މިއަހަރުގެ އެޕްރީލް މަހު 500 މިލިޔަން ޑޮލަރުގެ ސުކޫކާއި އިންޑިއާއިން ނަގާފައިވާ ލޯނުތައް ދެއްކުން ފާހަގަކޮށް، ފިޗުން ވަނީ މިދިޔަ ޖޫން މަހު ރާއްޖޭގެ ރޭޓިން "ސީސީ" އިން "ސީސީސީ" އަށް ބަދަލުކޮށްފައެވެ. އަދި މޫޑީސްއިން ވެސް ވަނީ މިދިޔަ ހަފުތާގައި ރާއްޖޭގެ ކްރެޑިޓް ރޭޓިން "ސީއޭއޭ 1" އަށް މަތިކޮށްފައެވެ.