ކާބޯތަކެތީގެ ރައްކާތެރިކަން ކަށަވަރުކުރުމަކީ އިޖުތިމާއީ ޒިންމާއެއް ކަމަށާއި، އެންމެން އެކުގައި ކުރާ މަސައްކަތުން ދިވެހިންނަށް ހެޔޮ އަގުގައި ސިއްހަތަށް ފައިދާހުރި ކާނާ ލިބޭނެކަން ކަށަވަރުކުރެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދުނިޔޭގެ ކާބޯތަކެތީގެ ދުވަހުގެ މުނާސަބަތުގައި ސޯޝަލް މީޑިއާގައި ހިއްސާކުރެއްވި މެސެޖެއްގައި ރައީސް ވަނީ މިއަހަރުގެ ޝިއާރަށް އަލިއަޅުއްވާލައްވާފައެވެ. އެމަނިކުފާނު ވިދާޅުވީ، މިއަދު އަޅުގަނޑުމެން ނިންމާ ނިންމުންތަކާއި ކުރާ އިންވެސްޓްމަންޓްތަކަކީ ކުރިއަށް އޮތް ޖީލުތަކުގެ ކާބޯތަކެތީގެ ރައްކާތެރިކަން ކަނޑައެޅިގެންދާނެ ކަންކަން ކަމަށެވެ.

Ad by Hajj Corporation

ރާއްޖެއަކީ ޖަޒީރާ ޤައުމަކަށްވުމުން، ކާބޯތަކެތީގެ ރައްކާތެރިކަން ހޯދުމަކީ ޤައުމީ ދިފާއީ އަދި އިޤުތިޞާދީ ދެމެހެއްޓެނިވި ކަމަށްޓަކައި ކޮންމެހެން ބޭނުންތެރި ކަމެއްކަން ރައީސް ފާހަގަކުރެއްވިއެވެ. އެގޮތުން އާ ޓެކްނޮލޮޖީތައް ބޭނުންކޮށް، އަމިއްލަ ފަސްގަނޑުގައި އުފެއްދުންތެރިކަން އިތުރުކޮށް، ދަނޑުވެރިންނާއި މަސްވެރިންނަށް އެއްބާރުލުން ދޭންޖެހޭކަމަށް ވިދާޅުވިއެވެ.

މަސްވެރިކަމާއި ދަނޑުވެރިކަން ކުރިއެރުވުމަށް ސަރުކާރުން އަޅާފައިވާ ފިޔަވަޅުތަކުގެ މައްޗަށް އަލިއަޅުއްވާލައްވަމުން ރައީސް ވިދާޅުވީ މަސްވެރިންނަށް 48 ގަޑިއިރުގެ ތެރޭގައި ފައިސާ ލިބޭނެ އިންތިޒާމު ހަމަޖެއްސުމާއި، މަސް ރައްކާކުރާނެ ތަންތަނާއި ޕްރޮސެސިންގ އުމްރާނީ ވަސީލަތްތައް ފުޅާކޮށްފައިވާނެ ކަމަށެވެ. އަދި ދަނޑުވެރިކަމުގެ މަޝްރޫއު ތަކުގެ ތެރެއިން ޕަބްލިކް-ޕްރައިވެޓް ޕާޓްނަޝިޕްގެ ދަށުން އެކި ރަށްރަށުގައި މަޝްރޫއުތައް ފަށާފައިވާނެ ކަމަށް ވިދާޅުވިއެވެ. މީގެ އިތުރުން ރައީސް ވަނީ ދަނޑުވެރިންގެ ތެރެއިން ލިބެންހުރި ބިންތައް ރަނގަޅު ގޮތުގައި ބޭނުންކުރުމަށް ބާރުއަޅުއްވާފައެވެ.

ރައީސްގެ މެސެޖް ނިންމަވާލައްވަމުން ވަނީ ދިވެހި ދަނޑުވެރިންނާއި މަސްވެރިން ބާރުވެރިކޮށް، އަމިއްލަ އުފެއްދުންތެރިކަން އިތުރުކޮށް، ކޮންމެ ގެއަކަށްވެސް ފައިދާހުރި، އަތްފޯރާފަށުގެ ކާބޯތަކެތި ލިބޭނެ ދިވެހިރާއްޖެއެއް ހޯދުމަށް އެންމެން ގުޅިގެން މަސައްކަތްކުރުމަށް ގޮވާލައްވާފައެވެ.