ދަރަނި މެނޭޖުކުރަން ކަނޑައެޅި އެޑްވައިޒިން ފާމުގެ އެއްބަސްވުން ރައީސް ޑރ މުހައްމަދު މުއިއްޒު ބާތިލު ކުރެއްވުމަކީ އެޅުއްވި ބުއްދުވެރި ފިޔަވަޅެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ. އެކްސްގައި އެކަން ހާމަކުރައްވާ ނިޝީދު ވިދާޅުވީ އެފަދަ އެޑުވައިޒަރުން އަޅުގަނޑުމެންގެ ޤައުމުން އިންތިހާޔަށް ނާޖައިޒް ފައިދާ ނަންގަވަމުން ގެންދަވާކަމަށެވެ. ރާއްޖޭގެ ދަރަނީގެ މައްސަލަ ހައްލުކުރުމުގެ މަސައްކަތުގައި ލަފާ ދޭން ދިވެހި ސަރުކާރުން ކަނޑައެޅި އެމެރިކާގެ އިންޑިޕެންޑެންޓް އިންވެސްޓްމެންޓް ބޭންކިން ފާމް، ސެންޓަވިއު ޕާޓްނާސްއާ އެކު ކުރިއަށް ނުދާން ސަރުކާރުން މިހާރު ވަނީ ނިންމާފައެވެ.

ދިވެހި ސަރުކާރުން އެގޮތަށް ނިންމީ ރާއްޖޭގެ ދަރަނި މެނޭޖުކުރުން ނުވަތަ ދަރަނި ދެއްކުން ލަސްކުރުމާ ގުޅޭ ކަންކަމުގައި ސީދާ ރައީސް ޑރ. މުހައްމަދު މުއިއްޒު ބޭރު ގައުމުތަކަށް ކުރެއްވި އެކިއެކި ދަތުރުފުޅުތަކުގައި ކުރިއެރުންތަކެއް ލިބިފައިވާތީއެވެ.

ފިނޭންސް މިނިސްޓްރީ އާއި އެމްއެމްއޭ އާއި މީރާ އާއި ފޮރިން މިނިސްޓްރީ ގުޅިގެން ދަރަނި މެނޭޖުކުރުމުގެ ކަންކަން ކުރިއަށް ގެންދަން ފިނޭންސް މިނިސްޓަރީ ވަނީ ނިންމާފައެވެ. އެ ނިންމުން ފިނޭންސް މިނިސްޓްރީން ނިންމާފައިވަނީ ރައީސްގެ ލަފާފުޅުގެ މަތިންނެވެ.

ފިނޭންސް މިނިސްޓްރީގެ އެންމެ ފަހުގެ ތަފާސް ހިސާބުތަކުން އެނގޭ ގޮތުން ރާއްޖޭގެ ޖުމްލަ ދަރަނި ހުރީ 126 ބިލިއަން ރުފިޔާގަ އެވެ. އެއީ އުފެއްދުންތެރިކަމުގެ ނިސްބަތުން 116 އިންސައްތައެވެ.