ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީއެސްއެމް) ގުޅިގެން ކުރިއަށްގެންދާ ސިލްސިލާ ފޯރަމް، "އަހާ" ގެ 10 ވަނަ ފޯރަމް މިރޭ 21:00 ގައި ސަލްޓަން ޕާކުގެ އިވެންޓް އޭރިއާގައި ބޭއްވުމަށް ނިންމައިފި އެވެ.

މި ފޯރަމަކީ ސަރުކާރުގެ އެކި ވުޒާރާތަކާއި އިދާރާތަކުން ކުރަމުންދާ މަސައްކަތްތަކުގެ އެންމެ ފަހުގެ މައުލޫމާތު ރައްޔިތުންނާ ހިއްސާކުރުމާއި، ރައްޔިތުންގެ ހުރި ކަންބޮޑުވުންތަކާއި ޝަކުވާތަކަށް ސީދާ މަސްއޫލުވެރިންގެ ފަރާތުން ޖަވާބު ހޯދައިދިނުމުގެ މަޤުޞަދުގައި ބާއްވަމުން އަންނަ ފޯރަމެކެވެ.

Ad by Hajj Corporation

މިރޭގެ ފޯރަމްގައި ބައިވެރިވެވަޑައިގަންނަވާނީ:

• ޢަބްދުﷲ ރާފިޢު - ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު

• ޙަސަން ޒަރީރު - މާލީކަންކަމާއި ސަރުކާރު ކުންފުނިތަކާ ބެހޭ ވަޒީރު

• ޢަލީ ޝަރީފް - މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު

ދެ ގަޑިއިރަށް ކުރިއަށްދާ މި ފޯރަމްގައި، ސަލްޓަން ޕާކަށް ގޮސްގެން ސީދާ ސުވާލުކުރުމުގެ ފުރުސަތު ލިބިގެންދާނެއެވެ. މީގެއިތުރުން ފޭސްބުކް، އެކްސް އަދި ޕީއެސްއެމް އެއަރ އެޕް މެދުވެރިކޮށް އޮންލައިންކޮށް ބައިވެރިވެ، ރާއްޖޭގެ ކޮންމެ ހިސާބަކުންވެސް ވަޒީރުންނާ ސުވާލު ހުށަހެޅޭނެއެވެ.

 ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން މި ފޯރަމްތައް ފަށާފައިވަނީ 2024 ވަނަ އަހަރުގެ ޖަނަވަރީ މަހުގެ ތެރޭގައެވެ. މިހާތަނަށް މިފަދަ 9 ފޯރަމެއް ވަނީ ބާއްވާފައެވެ.