ނަފްސާނީ ބަލިތަކަށް ފަރުވާ ހޯދުމުގައި ދިމާވާ ގޮންޖެހުންތައް ހައްލުކުރުމަށްޓަކައި، މުޅި ރާއްޖޭގައި ފަސޭހައިން ފަރުވާ ލިބޭނެ ގޮތް އެކަށައެޅުމަށް ދުރު ރާސްތާ ޕްލޭނެއް އެކުލަވާލުމުގެ މަސައްކަތް ފަށާފައިވާކަމަށް ސިއްޚަތާ ބެހޭ ވަޒީރު އަބްދުﷲ ނާޒިމް ވިދާޅުވެއްޖެއެވެ.

"އަހާ ފޯރަމް" ގައި ވާހަކަފުޅު ދައްކަވަމުން ވަޒީރު ނާޒިމް ވިދާޅުވީ، ނަފްސާނީ ބަލިތަކަށް ފަރުވާ ހޯދުމުގައި މިހާރު އެންމެ ބޮޑު ގޮންޖެހުމަކަށް ވެފައިވަނީ ބޮޑެތި ހޮސްޕިޓަލްތަކުގައި ނަފްސާނީ ބައްޔަށް އޮންނަ ކިއު ބޮޑުވުންކަމަށެވެ. މިގޮތަށް ކިއު ބޮޑުވަނީ ބަލިމީހުން ގިނަވެފައި، ފަރުވާ ދިނުމަށް ތިބި ޑޮކްޓަރުންނާއި ފަންނީ މީހުން މަދުވުމުގެ ސަބަބުންކަން ވަޒީރު ފާހަގަކުރެއްވިއެވެ.

Ad by Hajj Corporation

މި މައްސަލަ ހައްލުކުރުމަށް، އެންމެ ކްރިޓިކަލް ހާލަތުގައި ތިބޭ ބަލިމީހުންނަށް ކިއުގެ ނިޒާމުގެ ބޭރުން ވެސް ފަރުވާ ލިބޭނެ ނިޒާމެއް ޤާއިމުކުރުމަށް ވަނީ ރޭވިފައިވާކަމަށާއި މިގޮތުން، ބަލިމީހުންނަށާއި އާއިލާތަކަށް ހޮސްޕިޓަލްގެ އިމަޖެންސީއަށް ޒިޔާރަތްކޮށްގެން ނުވަތަ ހެލްޕްލައިނަށް ގުޅައިގެން އެހީތެރިކަން ހޯދޭނެކަމަށް ވަޒީރު ވިދާޅުވިއެވެ.

ވަޒީރު ނާޒިމް ވިދާޅުވި ގޮތުގައި ނަފްސާނީ ބަލީގައި އެންމެ މުހިންމު އެއް ކަމަކީ، އެންމެ ފުރަތަމަ އެހީ ބޭނުންވާ ވަގުތު އެހީ ލިބޭނެކަން ކަށަވަރުވެފައި އޮތުމެވެ.

ނަފްސާނީ ބަލިތަކަށް ފަރުވާ ހޯދުމަށް އެހީތެރިވުމުގެ ގޮތުން ސަރުކާރުން ވަނީ 24 ގަޑިއިރުގެ ހެލްޕްލައިން ޚިދުމަތެއް ގާއިމުކޮށްފައެވެ. މި ހެލްޕްލައިންގެ ޚިދުމަތް ވަރަށް ގިނަ ދިވެހި ރައްޔިތުން ބޭނުންކުރަމުންދާކަން ވެސް މިނިސްޓަރު ފާހަގަކުރެެއްވިއެވެ.