ފުޓްބޯޅައިގެ ތާރީޚުގައި މިހާތަނަށް އުފެދުނު އެންމެ މޮޅު ކުޅުންތެރިޔާ ނުވަތަ 'ބެސްޓް އޮފް އޯލް ޓައިމް' B.O.A.T (ބޯޓް) ހޮވުމަށް ނަގަމުންދާ ރަސްމީ ޕޯލްގައި ވާދަވެރި ލިއޮނަލް މެސީ ފަހަތަށް ޖައްސާލުމަށްފަހު، ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ބޮޑު ތަފާތަކުން ކުރި ހޯދައިފިއެވެ. މި ވޯޓު ކުރިއަށްދަނީ ފުޓްބޯޅައިގެ އެންމެ ޝަރަފުވެރި އެވޯޑު ދިނުމުގެ ރަސްމިއްޔާތު ލަންޑަނުގެ ދަ ލަންޑަން ޕެލޭޑިއަމްގައި ބޭއްވުމަށް ކައިރިވެފައިވަނިކޮށެވެ.

ބެލޮންޑިއޯ ރަސްމީކޮށް އިންތިޒާމުކުރާ ފަރާތްތަކުން ފުޓްބޯޅައިގެ 70 އަހަރުގެ ދިގު ތާރީޚު ފާހަގަކުރުމުގެ ގޮތުން ދޭ 'ބެލޮންޑިއޯ އޮފް އޯލް ޓައިމް' ޝަރަފުވެރި އެވޯޑަށް 10 ނޮމިނީން ވަނީ އިއުލާނުކޮށްފައެވެ. މިހާރު ސައޫދީގެ އަލް-ނަސްރަށް ކުޅެމުން އަންނަ ރޮނާލްޑޯ މި ޕޯލްގެ އެއްވަނައިގައި އޮތީ ޖުމްލަ ވޯޓުގެ 62% ގެ ބޮޑު އަޣުލަބިއްޔަތަކާ އެކުގައެވެ. އޭނާ އެންމެ ކުރީގައި އޮތީ މެންޗެސްޓާ ޔުނައިޓެޑާއެކު ޕްރިމިއާ ލީގާއި ޗެމްޕިއަންސް ލީގު ކާމިޔާބުކުރި 2008 ވަނަ އަހަރުގެ ކާމިޔާބު ސީޒަނަށެވެ.

Ad by Hajj Corporation

މި ލިސްޓުގެ ދެވަނައިގައި އާޖެންޓީނާގެ ތަރި އަދި އިންޓަ މިއާމީއަށް ކުޅޭ ލިއޮނަލް މެސީ އޮތް ނަމަވެސް، އޭނާއަށް ލިބިފައިވަނީ ނިސްބަތުން ވަރަށް ކުޑަ ވޯޓު އިންސައްތައެކެވެ. އެއް އަހަރެއްގެ ތެރޭގައި 91 ލަނޑު ޖަހައިގެން ތާރީޚީ ރެކޯޑެއް ހެދި މެސީގެ 2012 ވަނަ އަހަރުގެ ސީޒަނަށް ލިބިފައިވަނީ 13% ވޯޓެވެ. މީގެއިތުރުން، އާޖެންޓީނާއަށް ވޯލްޑް ކަޕް ކާމިޔާބުކޮށްދިން މެސީގެ 2023 ވަނަ އަހަރުގެ ސީޒަން ތިންވަނައިގައި އޮތީ 9% ވޯޓާއެކުގައެވެ.

މި ދެ ކުޅުންތެރިންގެ ދެމެދުގައި ވޯޓުގެ ނަތީޖާއިން ފެންނަން އޮތް ބޮޑު ފަރަގަކީ މިވަގުތު ދުނިޔޭގެ ކުޅިވަރު މީޑިއާތަކުގައި އެންމެ ބޮޑަށް ބަހުސްކުރެވެމުންދާ މައިގަނޑު މައުޟޫއެވެ.