ކީލިއަން އެމްބާޕޭ ކާމިޔާބުކުރި ދެ ލަނޑާއެކު، ވާދަވެރި ބާސެލޯނާގެ މައްޗަށް 2-1 އިން ކުރިހޯދައި ހޯސޭ މޮރީނިއޯގެ އިރުޝާދުގެ ދަށުން ކުޅެމުން އަންނަ ރެއާލް މެޑްރިޑުން މި ސީޒަނުގެ ފުރަތަމަ އެލް ކްލެސިކޯ މެޗު ކާމިޔާބުކޮށްފިއެވެ. ކޭމްޕް ނޯގައި ކުޅުނު މި މެޗުން ރެއާލް މޮޅުވީ މެޗު ނިމެން ތިން މިނެޓަށް ވެފައި ވަނިކޮށް އެމްބާޕޭ ޖެހި ލަނޑުންނެވެ.

މި މެޗަށް ނުކުތްއިރު ތާވަލުގެ އެއްވަނައިގައި ހަ ޕޮއިންޓުގެ ލީޑެއްގައި އޮތް ބާސެލޯނާ އަމާޒުހިފީ، ޔޫރަޕުގެ ގަދަ ފަސް ލީގުގެ ތާރީޚުގައި ވެސް ފުރަތަމަ ފަހަރަށް ސީޒަނުގެ ފުރަތަމަ 10 މެޗުން މޮޅުވި ޓީމުގެ ޝަރަފު ހޯދުމަށެވެ. ނަމަވެސް މެޗުގެ 41 ވަނަ މިނެޓުގައި ރެއާލް މެޑްރިޑުން ވަނީ ލީޑު ނަގާފައެވެ. ޔާން ދިއޮމާންޑޭ ނަގައިދިން ބޯޅައެއް ދިފާއުކުރަން އުޅުމުގެ ތެރޭގައި ބާސާގެ ޑިފެންޑަރު ޖެރާޑް މާޓިން ޖެހި ބޯޅަ އެމްބާޕޭގެ ގައިގައި ޖެހިފައި ވަނީ ގޯލުގެ ތެރެއަށެވެ.

Ad by Hajj Corporation

ދެވަނަ ހާފު ފެށިގެން ކުޅުމުގެ 60 މިނެޓު ހަމަވިތާ ކުޑައިރުކޮޅެއް ފަހުން ބާސެލޯނާއަށް ނަތީޖާ ހަމަހަމަކޮށްދިނީ ރަފީނިއާއެވެ. ޕެޑްރީ ތަނަވަސްކޮށްދިން ފުރުސަތަކުން ރަފީނިއާ ކާމިޔާބުކުރި މި ލަނޑަކީ މި ސީޒަނުގެ ލަލީގާގައި އޭނާ ޖެހި 13 ވަނަ ލަނޑެވެ. އެއަށްފަހު މެޗުގެ ނަތީޖާ އަނބުރާލަން ލަމީން ޔަމާލްއަށާއި މާޓިންއަށް ލިބުނު ފުރުސަތުތަކުގެ ހުރަހަކަށްވީ ރެއާލްގެ ގޯލްކީޕަރު އެންޑްރީ ލުނިންއެވެ.

ރެއާލް މެޑްރިޑް މޮޅުވި ލަނޑު 87 ވަނަ މިނެޓުގައި ފެނިގެންދިޔައީ ކައުންޓާ އެޓޭކެއްގައެވެ. ޖޫޑް ބެލިންހަމް ފަށައިގަތް ހަމަލާއެއްގައި ބަދަލު ކުޅުންތެރިއެއްގެ ގޮތުގައި ކުޅެން އެރި އެޑުއާޑޯ ކަމަވިންގާ އޭރިއާ ތެރެއަށް ހުރަސްކޮށްދިން ބޯޅަ އެމްބާޕޭ ވަނީ ހަމަޖެހިލާފައި ގޯލުގެ ތެރެއަށް ފޮނުވާލާފައެވެ. މި ލަނޑާއެކު ރެއާލްގެ ކޯޗު މޮރީނިއޯ ވަނީ ޓަޗްލައިން ކައިރީގައި ކަކޫމައްޗަށް ތިރިވެ ވަރަށް ބޮޑަށް އުފާފާޅުކޮށްފައެވެ.