އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހެޅުމަށް މާދަމާ ރައްޔިތުންގެ މަޖިލީހުގެ ޖަލްސާއެއް ބޭއްވުމަށް ނިންމައިފި އެވެ.

ބަޖެޓް ހުށަހެޅުމަށް ބާއްވާ ޖަލްސާ އޮންނާނީ މާދަމާ މެންދުރުފަހު 1:30ގައި ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދުގެ ޖަލްސާގައި ވަނީ އިއުލާންކުރައްވާފަ އެވެ.

Ad by Hajj Corporation

ސަރުކާރުން މާދަމާ ރައްޔިތުންގެ މަޖިލީހަށް ހުށަހަޅަނީ ކިތައް ބިލިއަން ރުފިޔާގެ ބަޖެޓެއް ކަމެއް އަދި އެނގިފައެއް ނުވެ އެވެ.

ރައްޔިތުންގެ މަޖިލީހުން މިއަހަރަށް ފާސްކޮށްފައިވަނީ 64.2 ބިލިއަން ރުފިޔާގެ ބަޖެޓެކެވެ. މިއީ 2025 ވަނަ އަހަރަށް ލަފާކުރި ބަޖެޓަށް ވުރެ ގާތްގަނޑަކަށް 8 ބިލިއަން ރުފިޔާ އިތުރު ބަޖެޓެކެވެ.

ދައުލަތުގެ މިއަހަރުގެ ބަޖެޓުގައިވާ ގޮތުން މިއަހަރު އާމްދަނީގެ ގޮތުގައި 40.2 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު ބަޖެޓް ޑެފިސިޓަކީ 8.8 ބިލިއަން ރުފިޔާ ކަމަށް ލަފާކޮށްފައިވެ އެވެ.

އަންނަ އަހަރުގެ ބަޖެޓް ހުށަހެޅުމަށް ސަރުކާރުން ތައްޔާރުވަމުންދާއިރު އިގްތިސާދީ އެންމެ އުދަނގޫ މަރުހަލާތައް ސަރުކާރުން މިއަހަރު ވަނީ ހިކުމަތްތެރިކަމާއެކު ކަނޑައްތުކޮށްފަ އެވެ. އެކަމުގެ ނަތީޖާއެއްގެ ގޮތުން ބައިނަލްއަގްވާމީ ރޭޓިން އެޖެންސީތަކުން ވަނީ ރާއްޖޭގެ ރޭޓިން މަތިކޮށް، މާލީ ނުރައްކާ ކުޑަ ގައުމެއްގެ ދަރަޖައަށް ރާއްޖެ ބަދަލުކޮށްފަ އެވެ.