އެފްއެލް ކަޕް (ކަރަބާއޯ ކަޕް) ގެ ގަދަ 16 ގައި ބްރައިޓަންއާ ދެކޮޅަށް ކުޅުނު ފޯރިގަދަ މެޗު ޕެނަލްޓީ ޖަހައިގެން 4-3 އިން ކާމިޔާބުކޮށް، މެންޗެސްޓާ ސިޓީ މުބާރާތުގެ ކުއާޓާ ފައިނަލަށް ދަތުރުކޮށްފިއެވެ. އިއްތިހާދު ސްޓޭޑިއަމްގައި ކުޅުނު މި މެޗުގެ ފުރިހަމަ ވަގުތު ހަމަވީ ދެ ޓީމު 2-2 އިން އެއްވަރުވެގެންނެވެ.

މެޗުގެ ފުރަތަމަ ލަނޑު ޖަހައި ލީޑު ނެގީ ބްރައިޓަން އިންނެވެ. ޖެކް ހިންޝަލްވުޑް ތަނަވަސްކޮށްދިން ފުރުސަތަކުން ޖޯޖިނިއޯ ރުޓާ ފޮނުވާލި ބޯޅަ ގޯލުގެ ތެރެއަށް ވައްދާލީ މަލިކް ޔަލްކޫޔޭ އެވެ. ނަމަވެސް، ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް، ފިލް ފޯޑެން ދިން ބޯޅައަކުން މަޓެއޯ ކޮވަސިޗް ވަނީ މޮޅު ގޯލެއް ޖަހައި ސިޓީއަށް ނަތީޖާ ހަމަހަމަކޮށްދީފައެވެ.

Ad by Hajj Corporation

ދެވަނަ ހާފު ފެށިގެން 77 ސިކުންތުގެ ތެރޭގައި ޖައުއެން ހަޖާމް ނަގައިދިން ހުރަހަކުން ރުޓާ ވަނީ އަނެއްކާވެސް ބްރައިޓަންއަށް ކުރިހޯދައިދީފައެވެ. އޭގެ ފަހުން ލީޑު ފުޅާކުރަން ރުޓާއަށް ރަނގަޅު ފުރުސަތުތަކެއް ލިބުނު ނަމަވެސް، ސިޓީގެ ކީޕަރު ޖެރޮނިމޯ ރުލީ ވަނީ ހުށިޔާރުކަމާއެކު އެ ހަމަލާތައް ދިފާއުކޮށްފައެވެ. ސިޓީން މެޗުގެ ނަތީޖާ އަނެއްކާވެސް އެއްވަރުކުރީ 72 ވަނަ މިނެޓުގައި ރަޔާން ޗަރްކީ ފޮނުވާލި ހިލޭޖެހުމެއް ވިޓޯ ރެއިސް ގައިގައި ޖެހިފައި ބައިކޮޅަށް ވަން ލަނޑުންނެވެ.

ނަތީޖާ ނެރުމަށް ޖެހި ޕެނަލްޓީ ޝޫޓްއައުޓްގައި ސިޓީގެ ބަތަލަކަށް ވީ ކީޕަރު ރުލީ އެވެ. ދެ ޓީމުން ޖެހި ފުރަތަމަ ތިން ޕެނަލްޓީ ވެސް ކާމިޔާބުކުރި އިރު، ސިޓީގެ ކޮވަސިޗް ޖެހި ޕެނަލްޓީ ބްރައިޓަންގެ ކީޕަރު ޖޭސަން ސްޓީލް ދިފާއުކުރިއެވެ. ނަމަވެސް، ބްރައިޓަންގެ ޔާސިން އަޔާރީ އަދި ލުވިސް ޑަންކް ފޮނުވާލި ޕެނަލްޓީތައް ރުލީ ދިފާއުކުރުމާއެކު، ސިޓީން ވަނީ 4-3 އިން ޝޫޓްއައުޓް ކާމިޔާބުކޮށްފައެވެ.

އެންމެ ފަހުން ކުޅުނު ޕްރިމިއާ ލީގު މެޗުން ބަލިވި ޓީމަށް ނުވަ ބަދަލެއް ގެނެސްގެން ކުޅުނު މި މެޗުގައި ސިޓީގެ އެންމެ މުހިންމު ދައުރެއް އަދާކުރީ ޗަރްކީ އެވެ. މި ކާމިޔާބީއާއެކު ސިޓީ ވަނީ އީއެފްއެލް ކަޕުގައި ވިދިވިދިގެން މޮޅުވި މެޗުތަކުގެ އަދަދު އަށަކަށް އަރުވައި، މުބާރާތުގެ ތާރީޚުގައި އެ ޓީމުގެ އެންމެ ދިގު މޮޅުވުމުގެ ރެކޯޑާ އެއްވަރުކޮށްފައެވެ.