ޖެިޖެހިގެން ބޮޑު ދެމެޗުން ބާސެލޯނާ ބަލިވިވުމުން އޭގެ ރޯޅި ކުދިޓީމުތަކަށް ބާލަން ފަށައިފިއެވެ. އެގޮތުން ރޭގައި ސްޕެނިޝް ލަލީގާގައި ރަފީނިއާ އަދި ލަމީން ޔަމާލް ޖެހި ދެ ލަނޑާއެކު 6-1 ގެ ބޮޑު ތަފާތަކުން އަލަވޭސް ބަލިކޮށް، ބާސެލޯނާއިން އަލުން ތާވަލުގެ އެއްވަނައަށް ޖެހިލައިފިއެވެ. ޕީއެސްޖީ އަދި ރެއާލް މެޑްރިޑް އަތުން ވީ ބައްޔަށްފަހު ހަންސީ ފްލިކްގެ ޓީމުން މި ހޯދި މޮޅަކީ އޭނާގެ އިރުޝާދުގެ ދަށުން ބާސެލޯނާ ހޯދި 100 ވަނަ ކާމިޔާބީއެވެ.

މެޗުގެ އަށްވަނަ މިނެޓުގައި ޕެޑްރީ އަދި ފާމިން ލޮޕޭޒް ތަނަވަސްކޮށްދިން ފުރުސަތަކުން ރަފީނިއާ ވަނީ ބާސެލޯނާއަށް ލީޑު ނަގައިދީފައެވެ. އޭގެ ފަހުން ޔަމާލްގެ އެހީތެރިކަމާއެކު ފާމިން ވަނީ 23 ވަނަ މިނެޓުގައި ލީޑު ފުޅާކޮށްފައެވެ. ފުރަތަމަ ހާފު ނިމުމުގެ ކުރިން ރަފީނިއާ އޭނާގެ ދެވަނަ ލަނޑު ކާމިޔާބުކުރިއިރު، އިތުރު ވަގުތުގައި ޔަމާލް ވެސް ވަނީ ލަނޑެއް ޖަހާފައެވެ.

Ad by Hajj Corporation

ދެވަނަ ހާފުގައި ބަދަލު ކުޅުންތެރިޔާ ގެބްރިއަލް ޖީސުސް ދިން ބޯޅައަކުން ޔަމާލް އޭނާގެ ދެވަނަ ލަނޑު ކާމިޔާބުކުރީ ވީއޭއާރުގެ ނިންމުމަކަށް ފަހުގައެވެ. އަދި 81 ވަނަ މިނެޓުގައި އެންތަނީ ގޯޑަން ވަނީ ޓީމުގެ ހަވަނަ ލަނޑު ޖަހާފައެވެ. މެޗުގެ ފަހުކޮޅު އަލަވޭސްގެ މަރިއާނޯ ޑިއާޒް ވަނީ އެ ޓީމަށް ހަމައެކަނި ލަނޑު ކާމިޔާބުކޮށްދީފައެވެ.

މި ސީޒަނުގެ ލަލީގާގައި ކުޅުނު 10 މެޗުން ރަފީނިއާ 15 ލަނޑު ހަމަކޮށްފައިވާއިރު، ޔަމާލް ވަނީ 23 ގޯލު ކޮންޓްރިބިއުޝަނާއެކު ޔޫރަޕްގެ ގަދަ ފަސް ލީގުގެ އެންމެ ކުރީގައި ރެކޯޑް ދަމަހައްޓާފައެވެ.