ނަޞްރުގެ ދުވަހުގެ މުނާސަބަތުގައި މިއަދު ހެނދުނު ބޭއްވި ދިދަނެގުމާއި ގާޑު ބަދަލުކުރުމުގެ ޚާއްޞަ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ބައިވެރިވެވަޑައިގެންފިއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އިންތިޒާމުކޮށްގެން މި ރަސްމިއްޔާތު ބާއްވާފައިވަނީ ޖުމްހޫރީ މައިދާނުގައި ހުންނަ ނޮވެމްބަރު 3 ގެ ހަނދާނީ ބިނާގައެވެ.

Ad by Hajj Corporation

ރައީސުލްޖުމްހޫރިއްޔާގެ އޮފީހުން ވިދާޅުވި ގޮތުގައި، މި ރަސްމިއްޔާތަކީ 3 ނޮވެމްބަރު 1988 ގައި ޤައުމުގެ ދިފާޢުގައި ޖިހާދުކޮށް ޝަހީދުވި ބަޠަލުންގެ ހަނދާނުގައި ޤައުމީ ފެންވަރުގައި ބޭއްވުނު ޚާއްޞަ އަދި ޝަރަފުވެރި އިޙްތިރާމުގެ ރަސްމިއްޔާތެކެވެ.

ނަޞްރުގެ ދުވަހަކީ ކޮންމެ އަހަރެއްގެ ވެސް ނޮވެމްބަރު މަހުގެ 3 ވަނަ ދުވަހު ދިވެހިރާއްޖޭގައި ފާހަގަކުރަމުން އަންނަ ވަރަށް މުހިންމު ޤައުމީ ދުވަހެކެވެ. މި ދުވަސް ނިސްބަތްވަނީ 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު، ދިވެހި ޚާއިނުންގެ ބަޔަކު އިސްވެ ތިބެ ސްރީލަންކާގެ ތަމަޅަ ބާޣީ ޖަމާޢަތެއް ކަމަށްވާ ޕީޕަލްސް ލިބަރޭޝަން އޮގަނައިޒޭޝަން އޮފް route ޓެމިލް އީލާމް (ޕްލޯޓް) ގެ ޓެރަރިސްޓުންނާއެކު ރާއްޖެއަށް ދިން ނުރައްކާތެރި ޢުދުވާނީ ޙަމަލާއިން ދިވެހި ޤައުމަށް ލިބުނު ފާހަގަކޮށްލެވޭ ފަޚުރުވެރި ނަޞްރަށެވެ.