ހުޅުމާލޭގެ ދެވަނަ ފޭސްގައި ވަގުތީ ގޮތުން ޤާއިމުކުރާ ބުޅާ ފެސިލިޓީ އަންނަ މަހުގެ 2 ވަނަ ދުވަހު ހުޅުވުމަށް ތައްޔާރުވެއްޖެއެވެ.

އެގޮތުން، މި ފެސިލިޓީގެ ހުރިހާ މަސައްކަތްތަކެއް މިހާރު ނިމިގައިވާ ކަމަށާއި، މި މަސައްކަތް ކުރިއަށް ގެންގޮސްފައިވަނީ މާލޭ ސިޓީ ކައުންސިލާ ހަވާލުކޮށްގެން ކަމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓަރީން މަޢުލޫމާތު ދެއްވައެވެ.

ހުޅުމާލޭގައި ގާއިމްކުރާ ބުޅާ ފެސިލިޓީތަކަށް ގެންދާ ބުޅާތަކަށް ފަރުވާދިނުމަށް ޑޮކްޓަރަކާއި ވެޓެރިނަރީ ނަރުހުން ހޯދަން މާލެސިޓީ ކައުންސިލުން މިހާރު ވަނީ އިޢުލާން ކޮށްފައެވެ.

މާލެ ސިޓީ ކައުންސިލުން އިއްޔެ ކުރި އިއުލާނުގައި ބުނެފައިވަނީ ފެސިލިޓީއަށް ގެންދާ ބުޅާތަކަށް ފަރުވާދިނުމަށް ޑޮކްޓަރަކާއި ދެ ނަރުހުން ބޭނުންވާ ކަމަށެވެ. ވެޓެރިނޭރިއަންއެއް ހޯދަން އިއުލާންކޮށްފައި ވަނީ 35،000ރ. އަށެވެ. ވެޓެރިނަރީ ނަރުހުންގެ މުސާރައިގެ ގޮތުގައި ކަނޑައަޅާފައި ވަނީ 8،130ރ. އެވެ.

އޭގެ އިތުރުން މަސައްކަތް ކުރާ ކޮންމެ ދުވަހަކަށް ސާވިސް އެލަވަންސްގެ ގޮތުގައި 100ރ. ކަނޑައަޅާފައިވާ އިރު، އިތުރުގަޑީގައި މަސައްކަތް ކުރާނަމަ، މުސާރައިގެ 35 ޕަސެންޓު ވެސް ލިބޭނެ އެވެ.

މި ފެސިލިޓީން ލިބޭ ހިދުމަތްތަކުގެ ތެރޭގައި އާންމު ޗެކަޕްތަކާއި، ފަރުވާތަކާއި، އަދި އޮޕަރޭޝަންތަކުގައި ވެޓެރިނޭރިއަނަށް އެހީތެރިވުމާއި ވެޓެރިނޭރިއަން އަންގާ ގޮތުގެ މަތިން ބުޅަލަށް ބޭސް ދިނުމާއި، ކާންދިނުމާއި، ބޭސްއެޅުން ހިމެނެ އެވެ. އަދި އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓްކުރުމާއި އެ ނޫންވެސް ބަލި ދެނެގަތުމަށް ކުރާ ޓެސްޓުތައް ކުރުމާއި، އެނެސްތީސިއާ ބެލެހެއްޓުމާއި އޮޕަރޭޝަނަށް ފަހު ރިކަވަރީގައި ތިބޭ ބުޅާތަކަށް ބޭނުންވާ ފަރުވާ ދިނުންވެސް މި ފެސިލިޓީގައި ހިމެނެ އެވެ.

މާލެ ސިޓި ކައުންސިލާއި ހަވާލުކޮށްގެން ކުރިއަށްގެންދާ ބުޅާ ފެސިލިޓީތައް ކުރިއަށް ގެންދިއުމަށް ހަމަޖެހިފައިވަނީ ފިޔަވަހިތަކަކަށް ބަހާލައިގެންނެވެ.