ބުޅާ ފެސިލިޓީ "އޮޅު ހިޔާ" ގެ ހިދުމަތް ދިނުން އަންނަ މަހުގެ ފުރަތަމަ ހަފްތާގެ ތެރޭގައި ފެށޭނެ ކަމަށް މާލެ ސިޓީ ކައުންސިލުން ބުނެފި އެވެ.

އެގޮތުން ފެސިލިޓީއަށް ބޭނުންވާ ސާމާނު ހޯދަން އެންމެ ފަހުން އިއުލާނު ކުރީ މިދިޔަ އާދިއްތަ ދުވަހުއެވެ. އެ އިއުލާނުގައި ކެޓްޝެލްޓާއަށް ހޯދަން އިއުލާނުކޮށްފައިވާ ސާމާނުތަކުގެ ތެރޭގައި 3 ޔުނިޓް ވެޓެރިނަރީ އައިސީޔޫ ކޭޖާއި 16 ޔުނިޓް ވެޓެރިނަރީ ކޭޖް ހިމެނެއެވެ.

ރާއްޖޭގައި މިފަދަ ދިރޭތަކެތި ރައްކާތެރިގޮތެއްގައި ބެލެހެއްޓުމަށް ރާއްޖޭގައި ފުރަތަމަ ފަހަރަށް މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ ނަމުގައި މިނިސްޓްރީއެއް ގާއިމުކުރެވިގެން ދިޔައީ މި ސަރުކާރުގައެވެ. އަދި މި ފެސިލިޓީ ގާއިމުކުރުމަށް ބިން ހަމަޖައްސަވައި ހުރިހާ ވަސީލަތްތަކެއް މަގު ފަހިކޮށްދެއްވައި މި މަޝްރޫއު ކުރިއަށް ގެންދިއުމަށް މާލެ ސިޓީ ކައުންސިލާ ހަވާލުކުރެއްވިއެވެ.

ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނެފައިވަނީ އެ ފެސިލިޓީގެ އޮޕަރޭޝަން ފަށައިގަތުމުގެ މަސައްކަތް މިހާރުވެސް ކުރެވުމުންދާކަމަށެވެ. އެގޮތުން މިހާރު ކުރެވެމުންދަނީ ފެސިލިޓީއަށް ބޭނުންވާ މީހުންނާއި ތަކެތި ހޯދުމުގެ މަސައްްކަތް ކަމަށް ވެސް ސިޓީ ކައުންސިލްގެ ޕޯސްޓްގައި ބުނެފައިވެއެވެ.

"އޮޅު ހިޔާ" އަކީ މި ސަރުކާރުގެ އިސްނެންގެވުމުގެ މަތީން މާލޭގެ މަގުތަކުގައި ގިނަވަމުންދާ ބުޅަލުގެ މައްސަލައަށް ދާއިމީ ހައްލެއް ހޯދުމުގެ ގޮތުން ޒަމާނީ ފެންވަރަށް ތަރައްގީކޮށްފައިވާ ފެސިލިޓީއެކެވެ. އަދި މި މަޝްރޫއުގެ މަގުސަދުތަކުގެ ތެރޭގައި ރާއްޖޭގައި ޕެޓްކެއާ ހަރުދަނާ ގަވާއިދުތަކަކާއި އުސޫލުތައް ތަންފީޒުކުރުން ހިމެނެއެވެ.