މަރުގެ އަދަބު ކަނޑައެޅުމާއި އަދަބު ތަންފީޒުކުރުމާބެހޭ ބިލު މިއަދު ރައްޔިތުންގެ މަޖިލީހަށް ހުށަހަޅައިފިއެވެ. ސަރުކާރުގެ ފަރާޓުން މި ބިލް މަޖިލީހަށް ހުށަހެޅުއްވީ ގުރައިދޫ ދާއިރާގެ މެންބަރު ހަނާން މުޙައްމަދު ރަޝީދެވެ. މިބިލަށް ބަހުސްކުރުންވެސް މިއަދު އޮންނާނެއެވެ.

ރާއްޖޭގެ ޖުމްހޫރިއްޔާގެ ޤާނޫނުއަސާސީ އާއި، ބައިނަލްއަޤުވާމީ ކަމާގުޅޭ އުސޫލުތަކާއި، އާއްމު ރައްޔިތުންގެ އަދި ކުށްވެރިޔާގެ ހައްގުތަކަށް ރިއާޔަތްކޮށް، ރާއްޖޭގެ މީހެއްގެ މައްޗަށް އަދަބު ތަންފީޒުކުރުމާގުޅޭ އުސޫލުތަކާ އިޖުރައަތުތައް ބަޔާންކުރާ ހަރުދަނާ ޤާނޫނީ އޮނިގަނޑެއް ތަޢާރަފްކުރުމީ މި ބިލް ހުށަހެޅި ސަބަބެއް ކަމަށް ބަޔާން ކޮށްފައިވެއެވެ.

Ad by Hajj Corporation

މި ބިލްގައި އަދަބު ތަންފީޒުކުރުން މަނާ ޙާލަތުތަކާއި ސަބަބުތަކުގެ އިތުރުންވެސް މަރުގެ އަދަބު ތަންފީޒު ކުރެވޭނެ ގޮތް ވަރަށް ރަނގަޅަށް ބަޔާންކޮށްދީފައިވެއެވެ. ހަމައެހެންމެ މަރުގެ އަދަބެއް ކަނޑައެޅުމުގައި ދަޢުލަތުން ފުރިހަމަކުރަންޖެހޭ އިލްތިޒާމުތަކާއި، މަރުގެ އަދަބު ކަނޑައެޅުނު މީހާއަށް ލިބޭ ހައްގުތަކާއި، މީހަކަށް މަރުގެ އަދަބު ކަނޑައެޅުމުގައި ފުރިހަމަ ވާންޖެހޭ ޝަރުތުތަކާއި، މަރުގެ އަދަބު ކަނޑައެޅުމުގައި ކޯޓުތަކުން އަމަލުކުރަން ޖެހޭނެ ގޮތް ވަރަށް ސާފުކޮށް ބަޔާން ކޮށްފައިވެއެވެ.