ސަރުކާރުގެ ފަރާތުން ރައްޔިތުންގެ މަޖިލީހަށް މިއަދު ހުށަހެޅުއްވި ހަތަރު ބިލަކީ އަވަސްއަރުވާލައިގެން ހުށަހެޅި ބިލުތަކެއް ނޫން ކަމަށާއި، އެއީ ފަންނީ ދިރާސާތަކުގެ އަލީގައި ތައްޔާރުކުރެވުނު މުހިންމު ބިލުތަކެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދު ބޭއްވެވި ނޫސްވެރިންގެ ބައްދަލުވުމުގައި ރައީސް ފާހަގަކުރެއްވި ގޮތުގައި، މިއީ ސަރުކާރުގެ ސިޔާސަތުތަކާ އެއްގޮތަށް، ނިޒާމީ ބޮޑެތި ބަދަލުތަކެއް ގެނައުމުގެ މަޤްޞަދުގައި ހުށަހެޅި ބިލުތަކެކެވެ.

Ad by Hajj Corporation

ސަރުކާރުގެ ފަރާތުން ރައްޔިތުންގެ މަޖިލީހަށް މިއަދު ހުށަހެޅުއްވީ މަރުގެ އަދަބު ތަންފީޒުކުރުމުގެ ބިލު، އިމިގްރޭޝަންގެ ބިލު، އަބުރާއި ބެހުމުގެ ބިލު، އަދި ރިއަލް އެސްޓޭޓް ވިޔަފާރީގެ ބިލެވެ.

މަޖިލީހަށް ހުށަހެޅި މި ހަތަރު ބިލާ ގުޅޭގޮތުން ވާހަކަދައްކަވަމުން ރައީސް ވިދާޅުވީ މަރުގެ އަދަބު ތަންފީޒުކުރުމުގެ ބިލު މިއީ ރާއްޖެއަށް ނުހަނު މުހިންމު ބިލެއްކަމަށެވެ. ރައީސް ވިދާޅުވީ ޝަރުޢީ މަރުޙަލާ ފުރިހަމަވުމުން މަރުގެ އަދަބު ތަންފީޒުކުރެއްވުމަށް ފަސްޖެހިވަޑައިނުގަންނަވާނެ ކަމަށެވެ. އަދި އިމިގްރޭޝަންގެ ބިލުން އިސްރާއީލުގެ ޕާސްޕޯޓުގައި ރާއްޖެއަށް އެތެރެނުވެވޭ ގޮތް ހެދުމަށްޓަކައި ޤާނޫނަށް ގެންނަންޖެހޭ އިޞްލާޙުތައް ހުށަހެޅުއްވާފައިވާ ކަން ރައީސް ފާހަގަކުރެއްވިއެވެ. އަބުރާއި ބެހުމުގެ ބިލަށް އަލިއަޅުއްވާލައްވަމުން ރައީސް ވިދާޅުވީ އަބުރާ ބެހުމަކީ މަދަނީ ކުށެއްގެ ގޮތުގައި ކަނޑައަޅައި، ރައްކާތެރިކަން ކަށަވަރުކުރަންޖެހޭ ކަމަށެވެ.

މީގެ އިތުރުން ރިއަލް އެސްޓޭޓް ވިޔަފާރީގެ ބިލަކީ ދީނާ ޚިލާފު ކަންކަމަށް ފުރުޞަތު ނުލިބޭނެހެން، ދެފުށް ފެންނަ ހާމަކަން ބޮޑު ނިޒާމެއްގެ ތެރެއިން ރިއަލް އެސްޓޭޓް ވިޔަފާރި ފުޅާކުރުމަށް މަގުފަހިކުރާ ބިލެއްކަމަށް ރައީސް ވިދާޅުވިއެވެ.