ދިވެހިރާއްޖޭގެ އިގުތިސާދު ސިންދަފާތުކޮށް، ދައުލަތަށް އާމްދަނީ ލިބޭނެ އައު ވަސީލަތްތައް އުފެއްދުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، ރާއްޖޭގެ ރިއަލް އެސްޓޭޓް ދާއިރާ ރެގިއުލޭޓް ކުރުމަށްޓަކައި ފުރިހަމަ ގާނޫނީ އޮނިގަނޑެއް އެކުލަވާލުމުގެ ޕްލޭންތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހިއްސާކުރައްވައިފިއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ބިންވެރިންނާއި، ޑިވެލޮޕަރުން އަދި މުދާ ގަންނަ ފަރާތްތަކުގެ ހައްގުތައް ފުރިހަމައަށް ހިމާޔަތްކޮށްދެވޭނެ ގޮތަށް، ރިއަލް އެސްޓޭޓް ސިނާއަތް ހިންގަންޖެހެނީ މިހާރަށްވުރެ ހަރުދަނާ ނިޒާމެއްގެ ތެރެއިން، ދެފުށް ފެންނަ އުސޫލަކުން ކަމަށެވެ.

Ad by Hajj Corporation

އިމާރާތްކޮށް ތަރައްގީކޮށްދޭނެ ކަމަށް ބުނެ ޑިވެލޮޕަރުން ވީ ވައުދުތަކުގެ މައްޗަށް ބުރަވެ، ދިވެހި ރައްޔިތުން އެމީހުންގެ ބިންތައް ހަވާލުކުރުމަށްފަހު، އެއްބަސްވި ގޮތަށް އެއްވެސް އެއްޗެއް ނުލިބި ބިންތައް ގެއްލިފައިވާ މައްސަލަތަކަށް ރައީސް އަލިއަޅުއްވާލެއްވިއެވެ. އަދި ބިންތައް ތަރައްގީކުރުމަށް ބޮޑެތި ލޯނުތައް ނެގުމަށްފަހު، މާލީ ގޮތުން ބޮޑެތި ތަކުލީފުތަކެއް އުފުލަންޖެހިފައިވާ ފަރާތްތަކުގެ މައްސަލަތައްވެސް އެމަނިކުފާނު ފާހަގަކުރެއްވިއެވެ.

އެމަނިކުފާނު ވިދާޅުވީ، އަލަށް ހުށަހަޅާ ރިއަލް އެސްޓޭޓް ބިލުގެ މަގުސަދަކީ ގާނޫނީ ޒިންމާތައް ސާފުކޮށް ކަނޑައަޅައި، ބިންވެރިންނާއި ޑިވެލޮޕަރުން އަދި ގަންނަ ފަރާތްތަކުގެ މެދުގައި ވެވޭ އެއްބަސްވުންތަކުގެ ދެފުށް ފެންނަކަން ކަށަވަރުކުރުމުގެ ތެރެއިން މިފަދަ ހާލަތްތައް މެދުވެރިވުން ހުއްޓުވުން ކަމަށެވެ.

ގާތްގަނޑަކަށް 100 ސަފުހާގެ މައްޗަށް އެކުލެވޭ މި ބިލުގައި، ރިއަލް އެސްޓޭޓް ހަރަކާތްތައް ރަޖިސްޓްރީކުރުމާއި ރެގިއުލޭޓް ކުރުމުގެ ކަންކަން ބެލެހެއްޓުމަށްޓަކައި، ކަމާބެހޭ ވުޒާރާގެ ދަށުން ހާއްސަ އޮފީހެއް ގާއިމުކުރުމަށްވެސް ހުށަހަޅާފައިވެއެވެ. މީގެއިތުރުން، މި ނިޒާމުގެ ތެރެއިން ރަޖިސްޓްރޭޝަން ފީގެ ގޮތުގައި ދައުލަތަށް އާމްދަނީ ލިބިގެންދާނެ ކަމަށްވެސް ވިދާޅުވިއެވެ.

ރައީސް ވިދާޅުވީ މި ބިލުގެ ދަށުން، އިންޓެގްރޭޓެޑް ރިއަލް އެސްޓޭޓް ޒޯންތަކުގެ މާސްޓާ ޑިވެލޮޕަރުންނަށް އެންމެ ދިގުވެގެން 99 އަހަރުގެ މުއްދަތަކަށް ތަރައްގީކުރުމުގެ ހައްގު ދެވިދާނެއެވެ. މީގެއިތުރުން، އެ ބިމުގެ އަގުގެ %10 އާ އެއްވަރުގެ ޕްރީމިއަމް ޕޭމަންޓެއް ދެއްކުމަށާއި، މި ޒޯންތަކުގައިވާ މުދަލުގެ މިލްކުވެރިކަން ބަދަލުކުރާއިރު %4 ގެ ރަޖިސްޓްރޭޝަން ފީއެއް ނެގުމަށްވެސް މި ބިލުގައި ކަނޑައަޅާފައިވެއެވެ.

މީގެއިތުރުން، މި ޒޯންތަކުގައި ހިންގާ ވިޔަފާރީގެ ހަރަކާތްތަކުން ޓީޖީއެސްޓީގެ ގޮތުގައި ދައުލަތަށް އާމްދަނީ ލިބޭނެ ކަމަށްވެސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ މި ފިޔަވަޅުތަކުގެ ސަބަބުން ދައުލަތަށް އިތުރު އާމްދަނީ ލިބި، ބޭރު ފައިސާ ވަންނަ މިންވަރު އިތުރުވެގެންދާނެ ކަމަށެވެ. އަދި މި ވަސީލަތްތައް ބޭނުންކުރުމަށް ސަރުކާރުން ގަސްތުކުރަނީ ދަރަނި އަދާކުރުމަށް އެހީތެރިވުމަށާއި ގައުމީ އިގުތިސާދު ވަރުގަދަކުރުމަށެވެ.

މި ބިލުގައި އިންޓެގްރޭޓެޑް ރިއަލް އެސްޓޭޓް ޒޯންތަކުގައި ހިންގުން މަނާ ކަންތައްތަކެއްވެސް ކަނޑައަޅާފައިވެއެވެ. އެގޮތުން މި ޒޯންތަކުގައި ބަނގުރަލާއި، ބަނގުރާ އެކުލެވޭ ބާވަތްތަކާއި، އޫރުމަހާއި އޫރުމަހުގެ ބާވަތްތައް އެތެރެކުރުމާއި ވިއްކުމަކީ ހުއްދަ ކަމެއް ނޫނެވެ.

ރިއަލް އެސްޓޭޓް ބިލަކީ ރާއްޖޭގެ އިގުތިސާދު ސިންދަފާތުކޮށް، ދައުލަތަށް ދެމެހެއްޓެނިވި ގޮތެއްގައި އާމްދަނީ ލިބޭނެ ވަސީލަތްތައް ގާއިމުކުރުމަށް ސަރުކާރުން ކުރަމުންދާ ފުޅާ މަސައްކަތްތަކުގެ ބައެކެވެ.