10 މީހުންނާއެކު ކުޅުނު ޕާކިސްތާނު ބަލިކޮށް އިންޑިއާއިން ސާފް ޗެންޕިއަންޝިޕްގެ ތަށި އުފުލާލައިފި
17 ނޮވެމްބަރު 2026 - 17:11

ބަންގްލަދޭޝްގެ ވެރިރަށް ޑާކާގައި ކުރިއަށްދިޔަ ސާފް ޗެމްޕިއަންޝިޕް 2026 ގެ ފައިނަލުގައި، ފަހަތުން އަރައި 2-1 އިން ޕާކިސްތާން ބަލިކޮށް އިންޑިއާއިން މުބާރާތުގެ ތަށި ކާމިޔާބުކަމާއެކު ދިފާއުކޮށްފިއެވެ.
މިއީ އިންޑިއާއިން މި މުބާރާތް ކާމިޔާބުކުރި 10 ވަނަ ފަހަރެވެ. އަދި މިއީ ވިދިވިދިގެން މި މުބާރާތް އިންޑިއާއިން ކާމިޔާބުކުރި ތިންވަނަ ފަހަރުވެސް މެއެވެ. މުބާރާތުގެ ފައިނަލުގައި ވާދަކުރި ޕާކިސްތާނަށް މިއީ ސާފް ޗެމްޕިއަންޝިޕްގެ ތާރީޚުގައިވެސް ފައިނަލުގައި ކުޅުނު ފުރަތަމަ ފަހަރެވެ.
.png&w=750&q=75)
Ad by Hajj Corporation
ޑާކާ ނޭޝަނަލް ސްޓޭޑިއަމްގައި ކުޅުނު މި ފޯރިގަދަ މެޗުގައި ފުރަތަމަ ލަނޑު ޖަހައި ކުރިހޯދީ ޕާކިސްތާނުންނެވެ. ފުރަތަމަ ހާފުގެ އިތުރު ވަގުތުގެ ތެރޭގައި މި ލަނޑު އެ ޓީމަށް ކާމިޔާބުކޮށްދިނީ އަލަމްގީރް އަލީ ޚާން ޣާޒީއެވެ. އޭނާ މި ލަނޑު ކާމިޔާބުކުރީ އިންޑިއާގެ ޕެނަލްޓީ އޭރިއާ ތެރޭގައި މުޅިން ހުހަށްހުރެ ގޯލުގެ ތެރެއަށް ބޯޅަ ފޮނުވާލައިގެންނެވެ.
ދެވަނަ ހާފު ފަށައިގެންވެސް ޕާކިސްތާނުން ވަނީ ލީޑު ފުޅާކުރަން ރަނގަޅު ހަމަލާއެއް އުފައްދާފައެވެ. ނަމަވެސް އޭރިއާ ބޭރުން އަލީ އަކްބަރު ޚާން ފޮނުވާލި ނުރައްކާތެރި ހަމަލާ އިންޑިއާގެ ގޯލްކީޕަރު އާޝް ވަނީ މަތަކޮށްފައެވެ. މެޗުގެ އޮއިވަރު ބަދަލުވެ ޕާކިސްތާނަށް ބޮޑު ގޮންޖެހުމަކާ ކުރިމަތިލާން ޖެހުނީ މެޗުގެ 55 ވަނަ މިނިޓުގައެވެ. އެއީ ޖުނައިދު ޝާހް ކުރި ފައުލަކާ ގުޅިގެން ވީއޭއާރު (VAR) ބެލުމަށްފަހު ރެފްރީ އޭނާއަށް ސީދާ ރަތް ކާޑު ދެއްކުމާ ގުޅިގެންނެވެ.
އެއް ކުޅުންތެރިއަކު މަދުކޮށް ޕާކިސްތާނުން ކުޅެން ޖެހުމުގެ ފައިދާ ނަގައި، އިންޑިއާއިން މެޗުގެ 60 ވަނަ މިނިޓުގައި ވަނީ ނަތީޖާ ހަމަހަމަކޮށްފައެވެ. މި ލަނޑު އޭރިއާ ތެރެއިން ލިބުނު ފުރުސަތެއްގައި އެ ޓީމަށް ޖަހައިދިނީ ސުހައިލް ބަޓްއެވެ.
އިންޑިއާއިން މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައި ވަނިކޮށް މެޗުގެ ލީޑު ނެގީ 88 ވަނަ މިނިޓުގައި ސަންޑީޕް މަންޑީ ކާމިޔާބުކޮށްދިން ލަނޑުންނެވެ. އޭނާ މި ލަނޑު ކާމިޔާބުކުރީ އެ ޓީމަށް ލިބުނު ކޯނަރެއްގެ ބޭނުން ހިފައި، ބޮލުން ގޯލުގެ ތެރެއަށް ބޯޅަ ވައްދާލައިގެންނެވެ.

-01.jpg&w=3840&q=75)
