ލޯނުގެ އިންޓްރެސްޓް ޓެކުހުން އުނިކުރެވޭ މިންވަރު 25 އިންސައްތައަށް ދަށްކޮށްފި
19 ނޮވެމްބަރު 2026 - 19:18

ވިޔަފާރިތަކުން ނަގާ ދަރަނީގެ އިންޓްރެސްޓް، ޓެކްސް ބިނާކުރެވޭ އާމްދަނީ ހިސާބުކުރުމުގައި އުނިކުރެވޭ މިންވަރު، ޓެކްސް-އެބިޓްޑާގެ 30 އިންސައްތައިން 25 އިންސައްތައަށް ދަށްކޮށް، އާމްދަނީން ޓެކްސް ނަގާ ގާނޫނަށް އިސްލާހެއް ގެނެސްފިއެވެ. އަދި މިންވަރަށްވުރެ އިތުރުވާ އިންޓްރެސްޓް ފަހުން އަންނަ އަހަރުތަކުގައި އުނިކުރުމުގެ ފުރުސަތުވެސް މި އިސްލާހުން އުވާލައިފިއެވެ.
މިއީ ޤާނޫނު ނަންބަރު 25/2019 (އާމްދަނީން ޓެކްސް ނެގުމުގެ ޤާނޫނު) އަށް ގެނެވުނު 3 ވަނަ އިސްލާހު، ގާނޫނު ނަންބަރު 18/2026 އެވެ. މި ގާނޫނަށް އަމަލުކުރަން ފަށާނީ 1 ޖަނަވަރީ 2027 އިންނެވެ. އިސްލާހުގެ ދަށުން ޓެކްސް ބިނާކުރެވޭ އާމްދަނީ ހިސާބުކުރާނީ ޓެކްސް އަހަރު 2027 އަށާއި އޭގެ ފަހުން އަންނަ ޓެކްސް އަހަރުތަކަށެވެ.
.png&w=750&q=75)
Ad by Hajj Corporation
އިސްލާހު ގެނެވިފައިވަނީ "ތިން-ކެޕިޓަލައިޒޭޝަން" ގެ ނަމުގައި އޮންނަ، ގާނޫނުގެ 71 ވަނަ މާއްދާއަށެވެ. އެ މާއްދާގެ ދަށުން، ލައިސަންސްލިބިފައިވާ ބޭންކަކަށް ނުވަތަ ބޭންކު-ނޫން މާލީ އިދާރާއަކަށް ދައްކާ އިންޓްރެސްޓް ފިޔަވައި، އެހެން ފަރާތްތަކަށް ދައްކާ އިންޓްރެސްޓުގެ ޖުމްލަ އަދަދު "އިންޓްރެސްޓް ކެޕޭސިޓީ" އަށްވުރެ އިތުރުވެއްޖެނަމަ، އެ އިތުރުވާ އަދަދު ޓެކްސް ހިސާބުކުރުމުގައި އުނިއެއް ނުކުރެވޭނެއެވެ. ޓެކްސް-އެބިޓްޑާ އަކީ، ގެއްލުން އުނިކުރުމުގެ ކުރިން އޮންނަ ފައިދާއަށް، އުނިކުރެވޭ އިންޓްރެސްޓާއި ކެޕިޓަލް އެލަވަންސް އެއްކުރުމުން އަންނަ އަދަދެވެ.
އިސްލާހުގެ ކުރިން، އިންޓްރެސްޓް ކެޕޭސިޓީ ކަމަށް ގާނޫނުގައި ބަޔާންކޮށްފައި ވަނީ ޓެކްސް-އެބިޓްޑާގެ 30 އިންސައްތައެވެ. އާ އިސްލާހުން އެ މިންވަރު 25 އިންސައްތައަށް ދަށްކޮށްފައިވާތީ، ޓެކްސް އަހަރު 2027 އިން ފެށިގެން، ބޭންކު ނޫން ފަރާތްތަކުން ފައިސާ ހޯދާ ވިޔަފާރިތަކަށް ޓެކްސް ހިސާބުކުރުމުގައި ކުރިއަށްވުރެ މަދު އިންޓްރެސްޓެއް އުނިކުރެވޭނެއެވެ.
ދެވަނަ ބޮޑު ބަދަލަކީ، މިންވަރަށްވުރެ އިތުރުވެގެން އުނިނުކުރެވި ދޫކޮށްލަންޖެހޭ އިންޓްރެސްޓް ފަހުން އަންނަ މުއްދަތުތަކުގައި އުނިކުރުމުގެ އިންތިޒާމު އުވާލުމެވެ. އިސްލާހުގެ ކުރިން، އެފަދަ އިންޓްރެސްޓް އެ އަހަރެއްގެ ކެޕޭސިޓީގެ ތެރޭގައި، މުއްދަތު ނިމުނު ތާރީހުން ފެށިގެން ގިނަވެގެން 10 އަހަރުދުވަހުގެ ތެރޭގައި އުނިކުރެވެއެވެ. އެ އިންތިޒާމު ހިމެނޭ 71 ވަނަ މާއްދާގެ (ނ)، (ރ) އަދި (ބ) އާއި، "އުނިނުކޮށް ދޫކޮށްލަންޖެހޭ އިންޓްރެސްޓް" ގެ މާނަ، އިސްލާހުން އުނިކޮށްފިއެވެ. 2027 ގެ ކުރީގެ އަހަރުތަކުން ގެންގޮސްފައިވާ އަދަދުތަކާ ބެހޭގޮތުން އިސްލާހުގައި ވަކި ގޮތެއް ބަޔާންކޮށްފައެއް ނުވެއެވެ.
ބޭންކުތަކާއި، ލައިސަންސްލިބިފައިވާ ބޭންކު-ނޫން މާލީ އިދާރާތަކާއި، ކުދި އަދި މެދު ފަންތީގެ ވިޔަފާރިތަކާއި، ސަރުކާރުން ބޮޑު ބައި ހިއްސާކުރާ ކުންފުނިތަކުގެ މައްޗަކަށް 71 ވަނަ މާއްދާ ނުހިނގާނެ ކަމަށް ގާނޫނުގައި ބުނާ ބުނުމަށް އިސްލާހުން ބަދަލެއް ނައެވެ. "އިންޓްރެސްޓް"، "ދަރަނި" އަދި "ޓެކްސް-އެބިޓްޑާ" ގެ މާނަތައްވެސް ކުރީގެ ގޮތަށް ބާކީ އޮވެއެވެ.

-01.jpg&w=3840&q=75)
