ގާނޫނަށް ގެނެވޭ ބަދަލުތަކާ އެކީ ކައުންސިލްތަކަށް ބޭނުންވާ ބަޖެޓް ބޮޑުކޮށްދިނުމަށް އަމާޒުހިފާފައިވާކަމަށް ސިޓީތަކާ ބެހޭ ވުޒާރާގެ ސްޓޭޓް މިނިސްޓަރު މޫސާ ފަތުހީ އާދަމް ވިދާޅުވެއްޖެއެވެ.

މެންދުރު ޓީވީގެ މައުޟޫ ޕްރޮގްރާމުގައި ވާހަކަފުޅު ދައްކަވަމުން ފަތުހީ ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވުމަށްފަހު އަތޮޅުތެރެއަށް ކުރެއްވި ޒިޔާރަތުގެ ތެރެއިން ހުރިހާ ކައުންސިލްތަކާ ބައްދަލުކުރައްވާފައިވާކަމަށާއި ކައުންސިލްތަކުންވަނީ ދިމާވާ ދަތިތައް ރައީސްއާ ހިއްސާކުރައްވާފައިކަމަށެވެ.

Ad by Hajj Corporation

"އެންމެ ބޮޑު ޝަކުވާއަކީ ކައުންސިލްތައް އިދާރީ ގޮތުން ހިންގުމަށް ބޭނުންވާނެ އުމްރާނީ ވަސީލަތްތައް ނެތުމާއި ބަޖެޓުގެ ދަތިކަމާއި އިންސާނީ ވަސީލަތުގެ ދަތިކަން. މީގެ ކުރިން މި ނިޒާމު ހިނގިނަމަ މި ޝަކުވާ ނާންނާނެ. މި މަސްތެރޭގައި 55 ކައުންސިލް އިދާރާ އިމާރާތްކުރުމުގެ މަސައްކަތް ކުރެވޭނެ".

ބަޖެޓުގެ ދަތިކަން ހައްލު ކުރެއްވުމަށްޓަކައިވެސް ގިނަ މަސައްކަތްތަކެއް ކުރަމުން އަންނަކަމަށް ފަތުހީ ވިދާޅުވިއެވެ.

" މިހާރު ދެނީ ސަރުކާރުގެ ބަޖެޓުން 5 އިންސައްތަ ކައުންސިލްތަކަށް. މިއީ އެކަށީގެންވާ އަދަދެއް ނޫން. މިހެންވެ ގާނޫނުގެ ތެރެއިން މިކަމަށް ހައްލު ގެންނަވާނެ".

ކައުންސިލްތައް ބާރުވެރިކުރުވައި އެ ތަންތަނަކީ ރައްޔިތުން ބަލައިގަންނަ، ދައުލަތުގެ މުއައްސަސާތަކުން އިޙްތިރާމްކުރާ ތަންތަން ކަމުގައި ހަދާނެކަމަށް ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރު ވެސް ވަނީ ވިދާޅުވެފައެވެ.

ވަޒީރު އާދަމް ޝަރީފު އުމަރު ވަނީ ލާމަރުކަޒީ ނިޒާމު އިތުރަށް ފުރިހަމައަށް ޕްރެކްސްޓިސް ކުރުމުގައި ސިޓީކައުންސިލްތަކުގެ މޭޔަރުންނާއި، އަތޮޅު ކައުންސިލްތަކުގެ ރައީސުންނާއި، އަދި ރަށު ކައުންސިލްތަކުގެ މެންބަރުންނަކީ ރަށްތައް ތަމްސީލުކުރައްވާ އިސް ފަރާތްތައް ކަމަށް ޤަބޫލްކުރައްވަން ޖެހިވަޑައިގެންނަވައި ކަމަށާއި އެހެންކަމުން ހުރިހައި ބޭފުޅުން ވެސް ލާމަރުކަޒީ ނިޒާމަށް އިހްތިރާމްކޮށް އިތުރަށް އަހުލުވެރިވާން ޖެހޭ ކަމަށް ކުރިން ވިދާޅުވެފައެވެ.

ވަޒީރު ވިދާޅުވީ ރައީސުލްޖުމުހުރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި ލާމަރުކަޒީ ނިޒާމު އިތުރަށް ހަރުދަނާވާނެ ކަން އެ މަނިކުފާނު ޔަޤީންކުރައްވަވާ ކަމުގައެވެ.