އަންނަ 2025 ވަނަ އަހަރުގެ ބަޖެޓު އެކުލަވާލާއިރު ކޮންމެ ރަށެއްގައިވެސް ތަރައްޤީގެ އެންމެ މުހިންމު މަޝްރޫޢުތަކަށް ފައިސާ ހިމެނުމަށް އިސްކަންދޭނެ ކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަޙްމަދު އަޒާން މަރްޒޫޤު ވިދާޅުވެއްޖެއެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގުރާމުގައި ވާހަކަ ދައްކަވަމުން މެންބަރު އަޒާން ވިދާޅުވި ގޮތުގައި، ބަޖެޓު އެކުލަވާލުމުގެ ކުރިން ކޮންމެ ރަށަކަށްވެސް އެންމެ ބޮޑަށް ބޭނުންވާ ތަރައްޤީގެ މަޝްރޫޢަކީ ކޮބައިތޯ ބެލޭނެއެވެ. އަދި ބަޖެޓުގައި ހިމެނުމަށް ބޮޑަށް އިސްކަންދެވޭނީ އެ މަޝްރޫޢެއް ހިންގަން ބޭނުންވާ ފައިސާ ހިމެނުމަށް ކަމަށް އެ މެންބަރު ފާހަގަކުރެއްވިއެވެ.

Ad by Hajj Corporation

"ހުރިހާ އިދާރާއަކަށްވެސް ބަޖެޓުގައި ކަނޑައަޅާނީ ކޮންމެހެން ކުރަންޖެހޭ ޚަރަދުތައް ހަމަޖައްސާލެވޭވަރަށް. މަޝްރޫޢުތައްވެސް ދެމެހެއްޓެނިވި ގޮތެއްގައި ކުރިއަށްގެންދެވޭނެ ގޮތަކަށް ބަޖެޓު އެކުލަވާލެވޭނީ،" މެންބަރު އަޒާން ވިދާޅުވިއެވެ.

އަޒާން މިފަދައިން ވިދާޅުވެފައިވާއިރު، އަންނަ މަހުގެ ތެރޭގައި މަޖިލީހަށް ދައުލަތުގެ 2025 ވަނަ އަހަރުގެ ބަޖެޓް ހުށަހަޅާނެއެވެ.