ރައްޔިތުންގެ މަޖިލީހުގެ މުހިންމު ދެ ކޮމިޓީއަކުން ހިތަދޫ މެދު ދާއިރާގެ މެންބަރު އަހުމަދު އަޒާން ވަކިކޮށްފިއެވެ.

މިއަދު ބޭއްވި މަޖިލީހުގެ ޖަލްސާގައި މަޖިލީހުގެ ރައީސް އަބްދުއްރަހީމް އަބްދުﷲ ވަނީ މިކަން ޢިއުލާން ކުރަށްވާފައެވެ.

އަޒާން ވަކިކޮށްފައި ވަނީ މަޖިލީހުގެ މާލިއްޔަތު ކޮމިޓީ އަދި ސަލާމަތީ ޚިދުމަތްތަކާ ބެހޭ (241) ކޮމިޓީންނެވެ. އެ ދެކޮމެޓީން އަޒާން ވަކިކުރުމަށް ނިންމާފައިވަނީ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޕާލިމެންޓަރީ ގްރޫޕުންނެވެ.

މި ނިންމުން އައިސްފައިވަނީ ޕީއެންސީގެ ވިޕްލައިނާ ޚިލާފަށް އަޒާން ވޯޓު ދެއްވި މައްސަލަ ފެންމަތިވެފައިވަނިކޮށެވެ.

ސުޕްރީމް ކޯޓުގެ ފަނޑިޔާރުންގެ ބެންޗުގެ އަދަދު 7 އިން 5 އަށް މަދުކުރުމަށް ކޯޓުތަކުގެ ޤާނޫނަށް ހުށަހެޅި އިޞްލާޙު ފާސްކުރުމަށް ޕީއެންސީގެ ޕާލިމެންޓަރީ ގްރޫޕުން ތްރީލައިން ވިޕެއް ނެރެފައިވަނިކޮށް، އެ ބިލަށް ވޯޓަށް އެހި ވަގުތު އަޒާން ވޯޓުގައި ބައިވެރިވެވަޑައިނުގަތުމަކީ މި މައްސަލަ ފެންމަތިވުމުގެ ސަބަބެވެ.

އަޒާންގެ ބަދަލުގައި މާލިއްޔަތު ކޮމިޓީއަށް ހަމަޖައްސާފައިވަނީ ހެންވޭރު އުތުރު ދާއިރާގެ މެންބަރު އަހުމަދު އައިފާނެވެ. އަދި 241 ކޮމިޓީއަށް އައްޔަންކޮށްފައިވަނީ ވިލިމާލޭ ދާއިރާގެ މެންބަރު މުހައްމަދު އިސްމާއީލެވެ. މި ދެ ކޮމިޓީގެ ބަދަލުގައި އަޒާން އައްޔަންކޮށްފައިވަނީ ޕެޓިޝަން ކޮމިޓީ އަދި އިމްތިޔާޒާއި ސުލޫކު ކޮމިޓީއަށެވެ.

މި ދެ ކޮމެޓީއަކީ މަޖިލީހުގެ އެންމެ މުހިންމެ ދެ އެއް ދެ ކޮމެޓީއެވެ.