ފުޓުބޯޅައިގައި ދުނިޔޭގައި އެންމެ މޮޅު ކުޅުންތެރިޔާއަށްދޭ ޝަރަފުވެރި އެވޯޑް، ބެލަންޑިއޯ އަށް ހޮވޭ ކުޅުންތެރިޔާ މި ހޯމަދުވަހު އެނގޭނެއެވެ. މި އަހަރުގެ ބެލަންޑިއޯއަށް އަންހެން އަދި ފިރިހެން ކެޓަގަރީއިން 30 ކުޅުންތެރިން ނޮމިނޭޓް ވެފައިވެއެވެ. ކޮންމެ އަހަރެއްގެ މޮޅު ކުޅުންތެރިން ހޮވަމުން އައި މި އެވޯޑް 2022 ވަނަ އަހަރުން ފެށިގެން ކޮންމެ ސީޒަނެއްގައި ދޭ އެވޯޑެއްގެ ގޮތުގައި ވަނީ ބަދަލުކޮށްފައެވެ.

ނިމިދިޔަ ސީޒަންގެ ބެލަންޑިއޯ ލިސްޓު ސެޕްޓެމްބަރު ފުރަތަމަ ހަފްތާގައި ޢިއުލާންކޮށްފައިވާިއރު، 8 ފަހަރު މި އެވޯޑް ހޯދާފައިވާ ލިއޮނެލް މެސީ އަދި 5 ފަހަރު މި އެވޯޑް ހޯދާފައިވާ ކްރިސްޓިއާނޯ ރޮނާލްޑޯ މި ލިސްޓަށް ނޮމިނޭޓް ވެފައި ނުވެއެވެ. މިއީ 2003 ވަނަ އަހަރުން ފެށިގެން މި ދެ ކުޅުންތެރިންގެ ތެރެއިން އެއްވެސް ކުޅުންތެރިޔެއް ނޮމިނޭޓުނުވާ ހަމައެކަނި ފަހަރެވެ.  

Ad by Hajj Corporation

ފުޓްބޯޅައި ތަޖުރިބާކާރު ޖާނަލިސްޓުން ވޯޓުދީގެން ހޮވާ މި އެވޯޑަށް މި ފަހަރު އެންމެ ވާދަކުރާނެކަމަށް ބެލެވެނީ ރެއާލް މެޑްރިޑްގެ ވިނީޝިއަސް ޖޫނިއަރ، ރެއާލް މެޑްރިޑް ގެ ޖޫޑް ބެލިންގްހަމް، މެންޗެސްޓަރ ސިޓީގެ ރޮޑްރީ އަދި އިންޓަރ މިލާންގެ ލައުޓާރޯ މާޓިނޭޒް އެވެ.

 އެގޮތުން ވިނީޝިއަޒް ޖޫނިއަރ ވަނީ މިދިޔަ ސީޒަންގައި ރެއާލް މެޑްރިޑް ޖޯޒީގައި މޮޅު ކުޅުމެއް ކުޅެފައެވެ. އަނިޔާގެ ސަބަބުން ސީޒަނުގެ ފުރަތަމަކޮޅު ގިނަމެޗުތަކެއް ގެއްލުނު ވިނީޝިއަސް ވަނީ ޖެނުއަރީގައި އަލުން ކުޅުމުގެ ތެރެއަށް އެނބުރި އައުމަށްފަހު އޭނާގެ އަސްލުފެންވަރު ދައްކާލާފައެވެ. ސީޒަނުގައި 26 ގޯލާއެކު 12 އެސިސްޓު ހަދައި ވިނީޝިއަސް ނިމިދިޔަ ސީޒަންގައި ސްޕެނިޝް ލަލީގާއާއި ޗެންޕިއަސް ލީގު ކާމިޔާބުކޮށް، ޗެންޕިއަންސް ލީގު ފައިނަލް މެޗުގައި ގޯލް ޖަހާ މުބާރާތުގެ މޮޅުކުޅުންތެރިޔާގެ މަޤާމު ހޯދާފައެވެ. އެހެންނަމަވެސް ބްރެޒިލްގެ ޖޯޒީގައި އެންމެ ފަހުން ކުޅެވުނު ކޮޕަ އެމެރިކާގައި ވިނީޝިއަސް އެންމެ އެދެވޭ ކުޅުމެއް ދެއްކިފައި ނުވެއެވެ.

މި ދިޔަ ސީޒަނުގައި ރެއާލް މެޑްރިޑާގުޅުނު އިންގްލަންޑްގެ ގެ ޖޫޑް ބެލިންގްހަމް ވެސް މި އަހަރު މި މަޤާމަށް ވާދަކުރާނެކަމަށް ބެލެއެވެ. ލަލީގާ ގެ މޮޅުކުޅުންތެރިޔާގެ މަޤާމުހޯދި ބެލިންގްހަމް ވަނީ މިދިޔަ ސީޒަންގައި 27 ގޯލާއެކު 15 އެސިސްޓް ހަދާފައެވެ. އަދި އޭނާވަނީ އިންގްލަންޑް ނިމިދިޔަ ޔޫރޯގެ ފައިނަލަށް ގެންދިޔުމުގައި މުހިންމު ދައުރެއް އަދާކޮށްދީފައެވެ.

މި ސީޒަނުގައި ބެލަންޑިއޯ އެވޯޑަށް އެންމެ ވާދަކުރާނެ އަނެއް ކުޅުންތެރިއަކީ މެންޗެސްޓަރ ސިޓީގެ ރޮޑްރީ އެވެ. އޭނާ ވަނީ މެންޗެސްޓަރ ސިޓީ ޖެހިޖެހިގެން 4 އަހަރު ޕްރީމިއަރ ލީގު ދިފާއުކުރުމުގައި މުހިންމު ދައުރެއް އަދާކޮށް، ސްޕެއިންއަށް ޔޫރޯ ކާމިޔާބުކޮށްދީފައެވެ. އަދި އޭނާވަނީ މިދިޔަ ސީޒަންގެ ޔޫރޯގެ މޮޅުކުޅުންތެރިޔާގެ މަޤާމު ހޯދާފައެވެ.

އާޖެންޓީނާގެ ޖޯޒީގައި ނިމިދިޔަ ކޮޕާ އެމެރިކާގެ އެންމެ ގިނަ ގޯލް ޖަހައި މުބާރާތް ކާމިޔާބު ކުރި ލައުޓާރޯ މާޓިނޭޒް ވެސް މި އެވޯޑަށް ވަރަށް ވާދަކުރާނެކަމަށް ބެލެވެއެވެ. އޭނާ ވަނީ މިދިޔަ ސީޒަންގައި އިޓާލިއަން ލީގުގެ ތަށިހޯދާ މުބާރާތުގެ އެންމެ ގިނަގޯލް ޖެހި ކުޅުންތެރިޔާގެ މަޤާމާއި، އެންމެ އަގުހުރި ކުޅުންތެރިޔާގެ މަޤާމުވެސް ހޯދާފައެވެ. މިދިޔަ ސީޒަންގައި 35 ގޯލާއި 8 އެސިސްޓް ހެދި ލައުޓާރޯ ވަނީ ލީގުގެ އިތުރުން އިޓާލިއަން ސުޕަކަޕް ވެސް ކާމިޔާބު ކޮށްފައެވެ.

ބެލަންޑިއޯ ސެރެމަނީގައި ނިމިދިޔަ ސީޒަންގެ އެންމެ މޮޅު ޒުވާން ކުޅުންތެރިޔާވެސް ހޮވާނެއެވެ. އެގޮތުން މި އެވޯޑް މިފަހަރު ލިބުން އެންމެ ގާތީ ބާސެލޯނާގެ ލަމީން ޔަމާލް އަށެވެ.

ފްރާންސް ފުޓްބޯލް އިން ދޭ މި އަހަރުގެ ބެލަންޑިއޯ އެވޯޑް ދިނުމުގެ ޙަފްލާ އޮންނާނީ އޮކްޓޯބަރު 2024 ވަނަ ހޯމަ ދުވަހުގެ ރޭގަނޑު ފްރާންސްގެ ވެރިރަށް ޕެރިހުގައެވެ.