ރާއްޖޭގެ ދެ އެއާރޕޯޓެއްގައި ޞިއްހީ ޤާބިލްކަން އިތުރުކުރުމަށް ބޭނުންވާ ބައެއް ސާމާނު ހަދިޔާކޮށްފިއެވެ.

މިއާލާތްތައް ހަދިޔާކޮށްފައިވަނީ އިންޓަރނޭޝަނަލް އޮގަނައިޒޭޝަން އޮފް މައިގްރޭޝަން، އައިއޯއެމްއާ ޖަޕާން ސަރުކާރު ގުޅިގެންނެވެ.

ވެލާނާ އިންޓަރނޭޝަނަލް އެއަރޕޯޓްގެ ސީޕްލޭން ޓާމިނަލްގައި ބޭއްވި ރަސްމިއްޔާތުގައި މި ތަކެއްޗާއި ހަވާލުވެވަޑައިގެންނެވީ ޚާރިޖީ ވަޒީރު ޑރ. އަބްދުﷲ ޚަލީލާއި، އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދެވެ.

މިރަސްމިއްޔާތުގައި ވާހަކަދައްކަވަމުން ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވީ، އެއަރޕޯޓްތަކަކީ ގައުމަށް އެތެރެވާ މީހުންގެ ފަރާތުން އަންނަ ބަލިތައް ދެނެގަނެ އެކަންކަން ކޮންޓްރޯލް ކުރުމަށް އެންމެ މުހިންމު ދައުރެއް އަދާކުރެވޭނެ ތަންކަމަށެވެ. ކޯވިޑް19 އިން ދަސްވެގެންދިޔަ ފިލާވަޅަކީ ސިއްޙީ ގޮތުން ދިމާވެދާނެކަމަކަށް ބޯޑަރުތައް ތައްޔާރުވެފައި އޮތުމުގެ މުހިންމުކަންކަމަށް ވަޒީރު ވިދާޅުވިއެވެ.

Ad by Hajj Corporation

އައިއޯއެމްއާއި ޖަޕާން ސަރުކާރުގެ އެހީގައި ހަދިޔާކުރި މިއިކުއިޕްމަންޓްތަކުގެ ސަބަބުން ދިވެހިންނާއި ރާއްޖެ އެތެރެވާ މީހުންގެ ސަލާމަތާއި ރައްކާތެރިކަން ކަށަވަރުކުރުމަށް އެހީވެދޭނެކަމަށް ވަޒީރު ވިދާޅުވިއެވެ.

މިރަސްމިއްޔާތުގައި ވާހަކަދައްކަވަމުން އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް ވިދާޅުވީ، ހަދިޔާކުރި މިއިކުއިޕްމަންޓްތަކާއެކު ރާއްޖޭގެ ބޯޑަރ ހެލްތު މެނޭޖްމަންޓަށް ވަރަށް ބޮޑު ފަސޭހައެއް ލިބިގެންދާނެކަމަށެވެ. އެއަރޕޯޓް ބޮޑުކުރުމުގެ މަޝްރޫޢާއެކު އައު ޓަރމިނަލުން އަހަރަކު 7.5 މިލިއަން ފަސިންޖަރުންނަށް ޚިދުމަތްދެވޭނެކަމަށެވެ. އެހެންކަމުން މިއީ ވަރަށް މުހިންމު ޕްރޮޖެކްޓަކަށް ވެގެންދާނެކަމަށް އޭނާ ވިދާޅުވިއެވެ.