މެންޗެސްޓަރ ޔުނައިޓެޑުގެ ލެޖެންޑް ނިސްތްރޯއީ ވަގުތީ ކޯޗުކަމާ ހަވާލުވިފަހުން ފުރަތަމަ ކުޅުނު މެޗުން އެޓީމުން ބޮޑުމޮޅެއް ހޯދައިފިއެވެ. އިނގިރޭސި ފުޓުބޯޅަ ލީގު ކަޕް ގައި ލެސްޓަރ ސިޓީއާ ދެކޮޅަށް ކުޅުން މެޗުން ޔުނައިޓެޑުން ވަނީ 5 ގޯލު ޖަހާފައެވެ. ޔުނައިޓެޑުގެ އަމިއްލަ ދަނޑުގައި ކުޅުނު މި މެޗުން ހޯދި ނަތީޖާއަކީ އެޓީމުން މި ސީޒަންގައި ދައްކާފައިވާ ދަށް ނަތީޖާތަކާއި ގުޅިގެން ސަޕޯޓަރުންނާ ކުޅުންތެރިން މާޔޫސްވެފައިވާ ދަނޑިވަޅުގައި، ސަޕޯޓަރުންނަށް އުފާވެރިކަމާއި އުއްމީދު ގެނުވާނެފަދަ ނަތީޖާއެކެވެ.

މި މެޗުގައި ޓީމުގެ ކެޕްޓަން ބްރޫނޯ ފަނާންޑޭޒް އަދި ކެސެމީރޯގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. މި ދެ ކުޅުންތެރިންނަކީ މި ސީޒަނުގައި މިހާތަނަށް ޔުނައިޓެޑުގެ ސަޕޯޓަރުންގެ ފަރާތުން އެންމެ ފާޑުކިޔުން ކުރިމަތިވެފައިވާ ދެ ކުޅުންތެރިންނެވެ. މި ދެ ކުޅުންތެރިންވެސް ވަނީ މި މެޗުގައި ކޮންމެ ކުޅުންތެރިޔަކު ދެ ގޯލް ޖަހާފައެވެ. މިއީ ގޯލު ޖެހުމަށް މަޝްހޫރު މިޑްފީލްޑަރ ބްރޫނޯ މި ސީޒަންގައި މިހާތަނަށް ކުލަބު ޖޯޒީގައި ޖަހާފައިވާ ހަމައެކަނި ދެ ގޯލުކަން ފާހަގަކޮށްލެވެއެވެ.

މެޗު ފެށިގެން 90 މިނެޓާއި ހަމައަށް މުޅި މެޗު ކޮންޓްރޯލުކޮށްގެން ޔުނައިޓެޑުން ކުޅުނު މި މެޗުގެ އެޓީމުގެ ފުރަތަމަ ގޯލް 15 ވަނަ މިނެޓުގައި ޖަހައިދިނީ ކަސެމީރޯއެވެ. ޔުނައިޓެޑުގެ ދެވަނަ ގޯލު ޖަހައިދިނީ ޒުވާން ކުޅުންތެރިޔާ ގަނަޗޯ އެވެ. އަދި ފުރަތަމަ ހާފު ނިމުމުގެ ކުރިން ޔުނައިޓެޑުން ވަނީ އިތުރު 2 ގޯލް ޖަހާފައެވެ. މި 2 ގޯލު ކާމިޔާބުކޮށްދިނީ ކެސެމީރޯ އާއި ބްރޫނޯއެވެ. ފުރަތަމަ ހާފު ނިމުމުގެ ކުރިން ލެސްޓަރ އިންވެސް ވަނީ 2 ގޯލު ޖަހާފައެވެ. އަދި ދެވަނަ ހާފުގައި މެންޗެސްޓަރ ގެ ފަހު ގޯލު ކާމިޔާބުކޮށްދިނީވެސް ބްރޫނޯއެވެ.

މި މެޗުގެ މޮޅު ކުޅުންތެރިޔަކަށް ހޮވިފައިވަނީ ކެސެމީރޯއެވެ. މިއީ މި ސީޒަންގައި ބޮޑެތި ފާޑުކިޔުންތަކެއް ކުރިމަތިވެފައިވާ ކެސެމީރޯ، އޭނާގެ ފެންވަރު ގެއްލިފައިވާކަމަށް ސުވާލު އުފައްދާފައިވާ ސަޕޯޓަރުންނާއި ފާޑުކިޔުންތެރިންނަށް ދިން ވަރުގަދަ މެސެޖެކެވެ.

މި މުބާރާތުގައި ކުއާޓަރ ފައިނަލުގައި މެންޗެސްޓަރ ޔުނައިޓެޑުން ކުޅޭނީ ޓޮޓްނަމް އާ ދެކޮޅަށެވެ. މި މެޗުކުޅެން ހަމަ ޖެހިފައިވަނީ ޑިސެމްބަރު މަހުގެ 17 ވަނަ ދުވަހުގެ ރޭ ރާއްޖެގަޑިން 12:45 ގަ އެވެ.