މިއީ ގެދޮރުވެރިކަމުގެ މައްސަލައަށް ދާއިމީ ހައްލެއް ގެނެސްދޭނެ ބަޖެޓަކަށް މި ބަޖެޓް ވެގެންދާނެކަމަށް ސަރުކާރުން ބުނެފިއެވެ.

ދައުލަތުން އަންނަ އަހަރަށް ލަފާކޮށްފައިވަނީ ޖުމްލަ 56.6 ބިލިއަން ރުފިޔާގެ ބަޖެޓެކެވެ.

ބޯހިޔާވަހިކަމުގެ މައްސަލައަކީ މުޅި ރާއްޖެއަށް ދިމާވެފައިވާ މައްސަލައަކަށް ވާއިރު މި މައްސަލަ ހައްލުކުރުމަށް ސަރުކާރުން ސީދާ ގޮތެއްގައި 1.5 ބިލިއަން ރުފިޔާގެ ހައުސިން މަޝްރޫއެއް ހިންގާނެކަމަށާއި މި މަޝްރޫއު މުޅި ރާއްޖެއަށް ބެހިގެން ދާނެކަމަށް ބަޖެޓުގައިވަނީ ހިމަނާފައެވެ.

މީގެ އިތުރުން ސަރުކާރުގެ ސިޔާސަތުގެ ތެރެއިން 5 އިންސައްތައިގައި 2 ބިލިއަނާއި 4 ބިލިއަނާއި ދެމެދުގެ ލޯނު ފަހިކޮށްދިނުން ބަޖެޓުގައި ހިމަނާފައިވެއެވެ.

ރާއްޖެއަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަކީ މިސަރުކާރުގެ އެއް ސިޔާސަތެވެ. ބޯހިޔާވަހިކަން ރައްޔިތުންނަށް ކަށަވަރު ކުރުމަށްޓަކައި ސަރުކާރުން ގިނަ މަޝްރޫއުތަކެއް ކުރިއަށް ގެންދިއުމަށް ނިންމާފައިވާއިރު ފުށިދިއްގަރު ފަޅު ނުވަތަ ރަސްމާލެ ހިއްކުމުގެ މަޝްރޫއުއަކީ ބޯހިޔާވަހިކަން ހައްލުކުރުމަށް ޓަކައި ސަރުކާރުން ކުރިއަށްގެންދާ ބޮޑެތި މަޝްރޫއު ތަކުގެ ތެރެއިން އެއްމަޝްރޫއެވެ.

ވެރިކަމުގެ ފަސް އަހަރު ނިމޭއިރު މުޅި ރާއްޖޭގައި ގެދޮރުގެ މައްސަލަ ހައްލުނުވާ އެއްވެސް މީހަކު ނުހުންނާނެ ކަމުގެ 100 އިންސައްތައިގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނި ދެއްވައިފައެވެ.

ރައީސް ވިދާޅުވެފައިވަނީ ގެދޮރުގެ މައްސަލައަށް އިސްކަން ދީގެން ދައުރުގެ އެންމެ ކުރީކޮޅުގައި އެންމެ ދުވަހެއްވެސް ބޭކާރުކޮށް ނުލައި ބާރު ސްޕީޑުގައި މަސައްކަތްތައް ކުރިއަށް ގެންދާ ކަމަށެވެ.