މިއަދު ފާހަގަކުރަމުންދާ ނަސްރުގެ ދުވަހަކީ ދުވަހުގެ ފެށުމުގެ ހަރަކާތްތަކުގައި ރައީސަކު ބައިވެރިވި ފުރަތަމަ ފަހަރެވެ.

ރައީސުލްޖުމްހޫރިޔާ ޑޮކްޓަރް މުހަންމަދު މުއިއްޒު ވަނީ މި ދުވަހުގެ މުނާސަބަތުގައި މިއަދު ހެނދުނު ސިފައިންގެ އިސްވެރިންގެ އަރިހުގައި ފަތިސް ނަމާދުގައި ބައިވެރިވެވަޑައިގެންފައެވެ.

Ad by Hajj Corporation

‏ ރައީސް އާއި ނައިބު ރައީސގެ އިތުރުން ދަޢުލަތުގެ އިސްވެރިން ފަތިސްނަމާދުގެ ޖަމާޢަތުގައި ދިވެހި އަސްކަރީންނާއެކު ބައިވެވަޑައިގެންފައިވާއިރު އިމާމްވެ ނަމާދުކުރެއްވީ ދިފާޢީ ވުޒާރާގެ ސްޓޭޓް މިނިސްޓަރު މުއާޒް ހަލީމެވެ.

މީގެއިތުރުން މީސްމިޑީއާގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ނަޞްރުގެ ދުވަހާއި ގުޅިގެން އެދުވަހު ދިވެހިން ދެއްކި ހިތްވަރާ އަޒުމް ދޭހަވާ ޅެން ބައިތުތައް ހިއްސާކުރައްވާފައެވެ. ރައީސް ހިއްސާ ކުރައްވާފައިވާ ބައިތުތަކުގައި، ދިވެހި އުއްމަތުގެ ހައްޤުގައްޔާއި ދިވެހި ދިދަ ހިމާޔަތް ކުރުމަށް ދިވެހިން އަތުގުޅާލާ ނިކުތްކަން ފާހަގަކުރައްވާފައިވެއެވެ.

އަދި ހަމަ މިއާއެކު މިއަދު ހެނދުނު އޮތް ޚާއްސަ ރަސްމިއްޔާތަކާ އެކު ނަސްރުގެ ދުވަހުގެ ސިފައިންގެ މައުރަޒުވެސް ހުޅުވައިދެއްވީ ރައީސްއެވެ.

ރައީސް މިއަދު ހުޅުވައިދެއްވި ސިފައިންގެ މައުރަޒުން ފެންނަނީ 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި އުދުވާނީ ހަމަލާގައި ލިބުނު ގެއްލުންތަކާއި އެދުވަހު ނަޞްރު ހޯދުމަށް ސިފައިން ދެއްކި ހިތްވަރެވެ. އަދި މި މައުރަޒުގެ މައިގަނޑު އެއް ބޭނުމަކީ ނަޞްރުގެ ދުވަހުގެ މަޢުލޫމާތު އަދުގެ ޖީލަށް ބުނެދިނުމެވެ. މި މައުރަޒުން ގާތްގަނޑަކަށް 200 އަށްވުރެ ގިނަ ޑިސްޕްލޭ ފެންނަން ހުންނާނެއެވެ. އެހެން އަހަރުތަކާ ޚިލާފަށް މިއަހަރުގެ މައުރަޒުގައި ފޮޓޯގެ އިތުރުން ނަޞްރުގެ ދުވަހު ބޭނުންކުރެއްވި ބައެއް އަސްލު ހަތިޔާރާއި ބައެއް ތަކެތި އާންމުންނަށް ދައްކާލުމަށް ބަހައްޓާފައިވެއެވެ.

މިއަދު ހަވީރު ޖުމްހޫރީ މައިދާނުގައި ކުރިޔަށްދިޔަ އަސްކަރީ ހުށައެޅުމުގައިވެސް ރައީސް ބައިވެރި ވަޑައިގެންނެވިއެވެ.