މާލޭގައި ހަރަކާތްތެރިވާ ގޭންގު ތަކާ ދެކޮޅަށް ދާހިލީ ވަޒީރު އަލީ އިހުސާން ހަރުކަށި އިންޒާރުތަކެއް ދެއްވައިފިއެވެ.

ވަޒީރު މިފަދައިން ވިދާޅުވީ ހުޅުމާލޭގައި ހުންނަ ހިޔާ 9 ވަނަ ޓަވަރުގެ އެޕާޓްމަންޓެއްގައި 12 މީހުންގެ ގޭންގަކުން ރަހީނު ކޮށްގެން ގެންގުޅު މީހަކު ސަލާމަތްކުރުމަށްފަހު މީޑިއާތަކާ ވާހަކަފުޅު ދައްކަވަމުންނެވެ.

ވަޒީރު ވިދާޅުވީ ދިވެހި ރައްޔިތުންގެ ސަލާމަތާއި ރައްކާތެރިކަމަކީ މި ސަރުކާރަށް ވަރަށް މުހިންމުކަމެއްކަމަށާއި ރައްޔިތުންގެ ސަލާމަތާއި ރައްކާތެރިކަން ހިމެނޭ މިފަދަ ކަންކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެެއްވެސް ވަރަކަށް ދޫ ނުދެއްވާނެކަމަށެވެ.

"ކުށް ކުރާ ފަރާތްތަކާ ދެކޮޅަށް އެޅެން އޮތް އެންމެ ހަރުކަށި ފިޔަވަޅު އަޅާނަން"

ބައެއް އެޕާޓްމަންޓް ތަކުގައި ކުށްކުރުން އިތުރުވެފައިވާކަން ފާހަގަކުރައްވައި ވަޒީރު ވަނީ އެ ތަންތަނުގެ ވެރިންނާ ވާހަކަ ދައްކާނެކަމަށާއި ދައުލަތަށް އެތަންތަން ނެގެން އޮތް ނަމަ ނަގާނެކަންވެސް ހާމަކުރައްވާފައެވެ.

އިހުސާން ވަނީ ފުލުހުންނަކީ 24 ގަޑިއިރު ރައްޔިތުން ހިދުމަތުގައި ތިއްބަވާނެ ބައެއްކަމުގެ ޔަގީންކަން ދެއްވާ، މިފަދަ މައްސަލަތަކަށް ދާއިމީ ހައްލެއް ގެންނަވާނެ ކަމަށް ވިދާޅުވެފައެވެ.

ހިޔާ ފްލެޓުގައި މީހަކު ރަހީނުކުރިއިރު ފްލެޓްތަކަށް ގެންގޮސް ފައިސާ އާއި އަގު ބޮޑު މުދާ ފޭރޭ މައްސަލަތައް މީގެކުރިން ވެސް ފެންމަތިވެފައިވެއެވެ.މިފަދަ ފްލެޓްތަކުގައި މަސްތުވާތަކެތި ބޭނުންކުރުމާއި އެތަކެތީގެ ވިޔަފާރިކުރުންވެސް ވަނީ އިންތިހާއަށް އިތުރުވެފައެވެ.

އެ މީހާ ރަހީނުކުރި ސަބަބެއް އަދި ހޭދަވި ދުވަހެއް ވެސް އަދި ސާފެއް ނުވެ އެވެ.