ޑޮމެއިން ބޭނުންކުރުމުގެ އައު އުސޫލު އެކުލަވާލާ ޑޮމެއިންތަކުގެ ރަޖިސްޓްރީއާއި ޑޮމެއިން ބޭނުން ކުރުމުގެ ހުއްދަ އައު ގަވާއިދާ އެއްގޮތަށް ބަދަލުކުރުމަށް އަންނަ އާދިއްތަ ދުވަހުން ފެށިގެން 60 ދުވަހުގެ ތެރޭގައި ޑޮމެއިން ރެޖިސްޓަރީ ކޮށްފައިވާ ކަމުގެ ލިޔުމާއި ފައިސާ ދެއްކި ކަމުގެ ސްލިޕް މިނިސްޓަރީއަށް ހުށަހެޅުމަށް ޓްރާންސްޕޯޓް މިނިސްޓްރީން އާންމު ކުރި އިސްލާހުގައި ބުނެފިއެވެ.

ޑޮމެއިން ބޭނުން ކުރުމުގެ ގަވާއިދު އިސްލާހުކޮށް މިހާރު ވަނީ ގެޒެޓުކޮށްފައެވެ.

ޑޮމެއިން ބޭނުން ކުރުމުގެ ގަވާއިދަށް މައިގަނޑުގޮތެއްގައި ގެނެސްފައި ވަނީ ދެ އިސްލާހެވެ. މިގަވާއިދުގެ 6 ވަނަ މާއްދާއަށް ގެނެސްފައިވާ އިސްލާހަކީ ޑޮމެއިންގެ ހިދުމަތް ދިނުމުގައި ދިމާވެފައިވާ ނުވަތަ ދިމާވާ މައްސަލަތައް ބަލައި އެ މައްސަލަތަކާ މެދު ގޮތް ނިންމުމަށް ކޮމެޓީ އެއް އެކުލަވާލުމަށެވެ. އަދި އެކޮމެޓީ އެކުލަވާލާނީ ޓްރާންސްޕޯޓް މިނިސްޓަރު ކަމަށް އިސްލާހުގައިވެއެވެ. އަދި އެ ކޮމިޓީގައި ތިބޭނީ ހަތް މެންބަރުން ކަމަށެވެ.

ޑޮމެއިން ނަމްބަރު ބޭނުންކުރާ އިރު އެކަމާ ބެހޭ ހުއްދަ އުޅަނދުގައި ނުވަތަ އެއުޅަންދެއް ދުއްވާ މީހެއްގެ އަތުގައި ފަސޭހައިން ފެންނަން އޮންނަން ވާނެ ކަމަށް އިސްލާހުގައި ބުނެފައިވެއެވެ. ޑޮމެއިން ބޭނުންކުރުމަށް ރަޖިސްޓްރީކޮށްފައިވާ އުޅަނދު ނޫން އެހެން އުޅަނދެއްގައި ޑޮމެއިން ބޭނުން ކުރުން މަނާވާނެ ކަމަށް ގަވާއިދުގައި ބުނެފައިވެއެވެ.

ޑޮމެއިން ރަޖިސްޓްރީކުރުމާއި އުޅަނދުގައި ޑޮމެއިން ބޭނުންކުރުމުގެ ހުއްދައާއި ޑޮމެއިންގެ ވެރިފަރާތް ބަދަލުކުރުމުގެ ހުއްދައާއި ޑޮމެއިން ދޫކޮށްފައިވާ އުޅަނދު ބަދަލުކުރުމަށް 500 ރުފިޔާގެ ފީއެއް ދައްކަންޖެހެއެވެ. މީގެ ކުރިން ދޫކޮށްފައިވާ ޑޮމެއިން ނަންބަރުތައް އަލުން ރަޖިސްޓަރީކޮށް މިގަވާއިދަށް ބަދަލުކުރުމަށް 3 މަސްދުވަހުގެ މުއްދަތެއް ވަނީ ދީފައެވެ. އަދި އެކަމަށް އެދި މިއަންނަ އާދިއްތަ ދުވަހުން ފެށިގެން ހުށައެޅޭނެކަމަށް އިސްލާހުގައި ބުނެފައިވެއެވެ. އަދި މިހާރު ދޫކޮށްފައިވާ ޑޮމެއިން ނަމްބަރުތައް ބޭނުންކުރުމުގެ ކުރީން ހުއްދަތައް އައު ގަވާއިދާ އެއްގޮތަށް ބަދަލު ކުރުމަށްޓަކައި އަންނަ އާދީއްތަ ދުވަހުން ފެށިގެން 60 ދުވަހުގެ ތެރޭގައި ޑޮމެއިން ރެޖިސްޓަރީ ކޮށްފައިވާ ކަމުގެ ލިޔުން ނުވަތަ ފައިސާ ދެއްކި ކަމުގެ ސްލިޕް މިނިސްޓަރީއަށް ހުށަހެޅުމަށްވެސް ބުނެފައިވެއެވެ.