ނޫސްތަކާއި މީޑިއާ ތައް ކޮންޓްރޯލް ކުރުމަކީ އެމަނިކުފާނު ގަބޫލުކުރައްވާ ހަމަޔެއްނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިހެން ވިދާޅުވީ ބޮޑެތި އަދަދުތަކުން ނޫސްވެރިންނާއި މީޑިއާތައް ޖޫރިމަނާ ކުރެވޭގޮތަށް ގާނޫނަށް އިސްލާހު ހުށަހަޅުއްވާފައިވަނިކޮށެވެ. މި ބިލު ރައްޔިތުންގެ މަޖިލީހަށް ހުށަހެޅުއްވީ އަމިއްލަ މެމްބަރެއްކަމުގައިވާ ތުޅާދޫ ދާއިރާގެ މެންބަރު ޢަބްދުލްޙަންނާން ޢަބޫބަކުރެވެ. މިބިލުގައި ވަނީ މީޑިއާތަކާއި ވަކިވަކި ނޫސްވެރިން ޖޫރިމަނާކޮށް ލައިސަންސް ބާތިލް ކުރުމުގެ ބާރު ވެސް ލިބޭ ގޮތަށެވެ.

މިބިލާ ގުޅިގެން ގިނަ ފާޑު ކިޔުންތަކެއް ސަރުކާރަށް ވަނީ އަމާޒުވެފައެވެ.

މިކަމާ ގުޅިގެން ރައީށް ކުރެއްވި އެކްސް ޕޯސްޓެއްގައި ވިދާޅުވީ ނޫސްތަކާއި މީޑިއާ ތައް ކޮންޓްރޯލް ކުރުމަކީ އެމަނިކުފާނު ޤަބޫލުކުރާ ހަމަޔެއްނޫން ކަމަށެވެ. އަދި މާތް ވެގެންވާ އިސްލާމްދީނާއި ދިވެހިރާއްޖޭގެ ޤާނޫނު އަސާސީ އާއި ޚިލާފު ނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިނގާ ސަރަޙައްދުގައި ކޮންމެ ދިވެއްސަކަށްވެސް އެމީހެއްގެ އަމިއްލަ މިނިވަންކަމާއެކު އެމީހަކު ބޭނުންކަމެއްކޮށް އުޅުމުގެ ޙައްޤު އޮންނާނެ ކަމަށް ރައީސް ވިދާޅުވި އެވެ.

ޢަބްދުލްޙަންނާން ޢަބޫބަކުރު ހުށަހެޅުއްވި ބިލުގައި ވަނީ މީޑިއާތަކާއި ވަކިވަކި ނޫސްވެރިން ޖޫރިމަނާކޮށް ލައިސަންސް ބާތިލް ކުރުމުގެ ބާރު ވެސް ލިބޭ ގޮތަށެވެ. މިބިލު ހުށަހެޅުއްވި ސަބަބެއްކަމަށް މެމްބަރު ވިދާޅުވީ ނޫސްވެރިކަމުގެ މިނިވަންކަން ދަމަހައްޓާ ނޫސްވެރިންނަށް ގާނޫނު އަސާސީން ލިބިދޭ ހައްގުތައް ކަށަވަރުކޮށްދެއްވުން ކަމަށެވެ. އަދި ނޫސްވެރިންނަށް ގާނޫނު އަސާސީން ލިބިދީފައިވާ ހައްގުތައް ޒިންމާދާރުކަމާއެކު ބޭނުން ކުރަމުންދޭތޯ ކަށަވަރު ކުރުމާއި ނޫސްވެރިކަމުގެ މިންގަނޑުތައް ހިފަހައްޓަމުންދޭތޯ ބެލުން ކަމަށް މެމްބަރު ވިދާޅުވިއެވެ.

ބިލުގައިވާ ގޮތުން، މޯލްޑިވްސް މީޑިއާ ކައުންސިލާއި ބްރޮޑްކާސްޓިން ކޮމިޝަން އުވާލުމަށް ވަނީ ނިންމާފައެވެ. އަދި މީޑިއާތައް ރެގިއުލޭޓް ކުރުމަށް މި ކޮމިޝަންތަކުގެ ބަދަލުގައި މީޑިއާ އެންޑް ބްރޯޑްކާސްޓިން ކޮމިޝަނެއް އުފެއްދުމަށް ބިލުގައި ހުށަހަޅާފައިވެއެވެ.

ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބިލުގައިވެ އެވެ. އަދި ވަކިވަކި ނޫސްވެރިން ވެސް 5،000 ރުފިޔާ އާއި 10،000 ރުފިޔާ އާ ދެމެދުގެ އަދަދަކުން ޖޫރިމަނާ ކުރުމުގެ ބާރު ވެސް ލިބެ އެވެ.