ރާއްޖެއާއި ރާއްޖެއިން ބޭރުގައި ހިނގާ އަނިޔާވެރި އަމަލުތަކާއި ހަރުކަށި ފިކުރުތަކަށް ހިތްވަރުދީ ނުހެދުމާއި އެފަދަ ކަންކަމުގައި ބައިވެރިނުވުން ހިމެނޭގޮތަށް އިމާމުންނާއި މުދިމުންގެ ސުލޫކީ މިންގަނޑު ބަހައްޓަންވީ ގޮތުގެ އުސޫލެއް ޤާއިމްކޮށް އާއްމުކޮށްފިއެވެ.

މި އުސޫލަކީ މުޅިން އަލަށް އާއްމުކުރި އުސޫލެއްކަން ފާހަގަކޮށްލެވެއެވެ.

މި އުސޫލުގެ މަގުސަދަކީ މިސްކިތްތަކުގެ އިމާމުންނާއި މުދިމުންނަކީ އިސްލާމްދީނާއި ދިވެހިރާއްޖޭގެ ޤާނޫނު އަސާސީއާއި ޤާނޫނުތަކާއި ގަވާއިދުތަކާއި އާއްމު އިޖުތިމާޢީ މިންގަނޑުތަކާއި އެއްގޮތަށް ޢަމަލުކުރާ ބައެއްކަން ކަށަވަރުކުރުމާއި، މިސްކިތްތަކުގެ އިމާމުންނާއި މުދިމުންނަކީ ދީނީ އެއްބައިވަންތަކަމާއި ޤައުމީ ވަޙްދަތު ދެމެހެއްޓުމަށް މަސައްކަތްކުރާ ބަޔަކަށް ހެދުމާއި، ވަޒީފާގެ ޒިންމާތަކަށް ރައްކާތެރިވުމަށް ބާރުއެޅުމަށާއި ހުރިހާ އިމާމުން ޢަމަލުކުރާނެ އެއް މިންގަނޑެއް ކަނޑައެޅުމެވެ.

މީގެ އިތުރުން އިމާމުންނާއި މުދިމުންނަކީ ރިވެތި އަޚުލާޤީ ސިފަތައް ދަމަހައްޓާ ސުލޫކު ރަނގަޅު ނަމޫނާ ބަޔަކަށް ހެދުމާއި އިމާމުންނާއި މުދިމުންނަކީ މުޖުތަމަޢު ބަލައިގަންނަ އަބުރުވެރި އަދި އާއްމުން އިތުބާރުކުރާ ފަދަ ބަޔަކަށް ހެދުމަކީވެސް މި އުސޫލު ޤާއިމްކުރުމުގެ މަގުސަދުތަކުގައި ހިމެނޭ ކަންކަމެވެ.

މި އުސޫލުގައި އިމާމުންނާއި މުދިމުންގެ ވާޖިބާއި މަސްއޫލިއްޔަތު އަދާކުރަންވީ ގޮތާއި، ހެދުން އެޅުމުގައި ބަހައްޓަންވީ އަދި ފަރުވާތެރިވާންވީ ކަންކަމާއި އަމިއްލަ ކަންކަމާއި އުޅުންތައް ބަހައްޓަންވީ ގޮތާއި މިސްކިތުގައި ކުރާ އަޅުކަމާއި ގުޅުންހުރި ކަންކަމުގައި ޢަމަލުކުރަންވީ ގޮތުގެ ތަފްސީލް ވަނީ ހިމަނާފައެވެ. މީގެ އިތުރުން މިސްކިތުގައި ހިނގާ ނޭދެވޭ ކަންކަން ހުއްޓުވުމާއި ގުޅޭ ގޮތުންނާއި ޤާނޫނާއި ގަވާއިދުތަކަށް ހުރުމަތްތެރިކޮށް ހިތުމާއި، މި އުސޫލަށް ތަބާނުވާނަމަ ފިޔަވަޅު އަޅާނެ ގޮތްތައްވެސް މި އުސޫލުގައި ހިމަނާފައިވާކަން ފާހަގަކޮށްލެވެއެވެ.

މީގެ ތެރޭގައި ރައްޔިތުންނަށް އޮޅޭ ފަދަ ގޮތްގޮތަށް ދީނީ ވާހަކަތައް ނުދެއްކުމާއި، ދިވެހިންގެ މަސްލަހަތު ގެއްލޭފަދަ ކަންކަން ސޯޝަލް މީޑިއާގެ ވަސީލަތްތައް ބޭނުންކޮށްގެން ނުކުރުމާއި، އަޅުކަމުގައި މެދުމިނުގައި ހިފުމާއި، ކުރީގެ އިލްމުވެރިންނާއި މިހާރުގެ އިލްމުވެރިންނަށް އިހުތިރާމުކުރުންވެސް ހިމަނާފައިވެއެވެ.

މީގެ އިތުރުން ހުއްދަ ލިބިގެން ނޫންގޮތަކަށް މިސްކިތްތަކުގައި ދީނީ ހަރަކާތްތައް ނުބޭއްވުމާއި މިސްކިތައް އަންނަ މީހުންނަށް އިހުތިރާމުކުރުންވެސް އުސޫލުގައި ހިމަނާފައިވެއެވެ.

މި އުސޫލާ ހިލާފުވާ މުދިމުންނާއި އިމާމުން ސިވިލް ސާވިސްގެ ގައިވާއިދުގެ ދަށުން ފިޔަވަޅު އަޅާނެކަމަށް އުސޫލަގައިވެއެވެ.

މި އުސޫލާއި ގުޅޭ ގޮތުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ، މިއީ އިސްލާމީ ކަންކަމުގެ ނިޒާމް ހަރުދަނާ ކުރުމަށް ރައީސް ޑރ. މުޙައްމަދު މުޢިއްޒުގެ އިރުޝާދުގެ ދަށުން ކުރިއަށް ގެންދެވޭ މަަސައްކަތުގެ ބައެއްކަމަށެވެ. އިމާމުންގެ ކަންކަން ހަރުދަނާ ކުރުމަށް ވުޒާރާއިން މިހާރު ގިނަ މަސައްކަތްތަކެއް ކުރަމުންދާއިރު، އިމާމުންނަށް އިތުރު ތަމްރީންދީ ފެންވަރު މަތިކުރުމަށްވެސް ގިނަ މަސައްކަތްތަކެއް ކުރަމުންދާކަން ފާހަގަކޮށްލެވެއެވެ.