ކައުންސިލްތައް ބާރުވެރިކުރުވާ ވާހަކަ އިދިކޮޅު އެމްޑީޕީން ދައްކާއިރު އެމްޑީޕީގެ ވެރިކަމުގައި އޭރުގެ ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު މާލޭ ސިޓީ ކައުންސިލާ ބައްދަލުވެސް ކުރައްވާފައި ނުވާކަމަށް މާލޭގެ ޑެޕިއުޓީ މޭޔަރު އަހުމަދު ނަރީޝް ވިދާޅުވެއްޖެއެވެ.

ނަރީޝް މިފަދައިން ވިދާޅުވީ މެންދުރު ޓީވީގެ މައުޟޫ ޕްރޮގްރާމްގައި ވާހަކަފުޅު ދައްކަވަމުންނެވެ.

" ރައީސް މުއިއްޒު މޭޔަރަކަށް ހުންނެވި އިރު ބައްދަލެއް ނުކުރެއްވި ކައުންސިލަކާ. އަދި ނުވިތާކަށް އެބޭފުޅުންގެ ޕާޓީގެ ކައުންސިލަރުންނާ ވަކިންވެސް ބައްދަލުނުކުރެއްވި. މި ދަންނަވަނީ ރާއްޖޭގެ 3 ބައިކުޅަ ދެބަޔަސް ހިދުމަތްދޭ ކައުންސިލެއްގެ ވާހަކަ. ހަމައެކަނި މި އިބާރާތުން ވެސް ދޭހަވާނެ ލާމަރުކަޒީއާމެދު އެމްޑީޕީން ދެކޭގޮތް".

ނަރީޝް ވަނީ މީގެ އިތުރުންވެސް އެމްޑީޕީގެ ވެރިކަމުގައި ސިޓީ ކައުންސިލަށް ކުރި އުނދަގޫތައް ހިއްސާކުރައްވާފައެވެ.

" ދެ އިރު ކާ ބޭހެއްހެން އަކުރަމް ކަމާލުއްދީން ސިޓީ ފޮނުއްވި ބިންތައް އަތުލަން. އެހާ ވަރަކަށް ބަޔަކަށް ޖެެއްސުންކުރެވޭނީ"

ނަރީޝް އިތުރަށް ވިދާޅުވީ މިހާރު މޭޔަރަކަށް ހުންނެވީ އިދިކޮޅު އެމްޑީޕީގެ ބޭފުޅެއްކަމަށާއި ނަމަވެސް އެއްވެސް ކަމެއްގައި ސިޓީ ކައުންސިލަށް ސަރުކާރުން ދުއްތުރާ ނުކުރާކަމަށެވެ. ވުމާއެކު ކައުންސިލްތައް ބާރުވެރިކުރުވައި ލާމަރުކަޒީ ނިޒާމު އޭގެ ފުރިހަމަ މާނައިގައި ހިނގާތަން ފެންނަނީ މިހާރުކަމަށް ނަރީޝްވަނީ ވިދާޅުވެފައެވެ.