2019 ވަނަ އަހަރު އޮޕަރޭޝަނަށް ގެނެސް ބޭނުންކުރަން ފެށި ދަރުމަވަންތަ ހޮސްޕިޓަލް, ޓާޝިއަރީ ފެންވަރުގައި ރަސްމީކޮށް މިރޭ ހުޅުވައިފިއެވެ.

2015 ވަނަ އަހަރު ޢަމަލީ މަސައްކަތް ފަށައި، 2018 ވަނަ އަހަރު ޢަމަލީ މަސައްކަތް ނިންމި އެ ހޮސްޕިޓަލް މިރޭ ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. އެ ހޮސްޕިޓަލް ރަސްމީކޮށް ހުޅުވުމަށްޓަކައި މިރޭ ވަނީ، ޚާއްސަ ރަސްމިއްޔާތެއް ވެސް ބާއްވާފައެވެ.

Ad by Hajj Corporation

އެ ރަސްމިއްޔާތުގައި ވަނީ ދަރުމަވަންތަ ހޮސްޕިޓަލުގެ އިތުރުން، ނޭޝަނަލް ފާޓިލިޓީ ސެންޓަރު އަދި ދަރުމަވަންތަ ހޮސްޕިޓަލުގެ އެމަޖެންސީ ރޫމް އަދި ހައިބްރިޑް ކެތުލެބް ވެސް ރަސްމީކޮށް ހުޅުވައިފައެެވެ.

ދަރުމަވަންތަ ހޮސްޕިޓަލަކީ ދައުލަތުގެ ބަޖެޓުން ގާތްގަޑަކަށް 200 މިލިއަން ޑޮލަރު ނުވަތަ 3 ބިލިއަނެއްހާ ރުފިޔާ ޚަރަދުކޮށްގެން ޢިމާރަތްކުރި ހޮސްޕިޓަލެކެވެ. އެހެން ނަމަވެސް މިއަދާ ހަމައަށް އައިއިރު ވެސް، އެ ހޮސްޕިޓަލު ރަސްމީކޮށް ނުހުޅުވައި، ބައެއް ފަންގިފިލާތަކުގައި ހުރީ ތަޅުއެޅުވި، ބައެއް ޚިދުމަތްތައް ނުފެށިފައެވެ.

ކުރީގެ ރައީސް އަބްދުﷲ ޔާމީން އަބްދުލްޤައްޔޫމުގެ ވެރިކަމުގައި ހުޅުވަން ނިންމި އެ ހޮސްޕިޓަލް ހުޅުވުމަށްޓަކައި، 2018 ވަނަ އަހަރުގެ ޖުލައި 26 ގައި އެ ހޮސްޕިޓަލް ރަސްމީކޮށް ހުޅުވުމަށް އެ ސަރުކާރުން އަމާޒުހިފިއެވެ. އެހެން ނަމަވެސް އެކަން އެގޮތުގައި ނުވެ، 2019 ވަނަ އަހަރުގެ ކުރީކޮޅު އެ ހޮސްޕިޓަލް ބޭނުންކުރަން ފެށިއެވެ.

އެހެން ނަމަވެސް މިރޭ އެ ހޮސްޕިޓަލް ހުޅުވާފައިވަނީ، މީގެ ކުރިން އެ ހޮސްޕިޓަލުގައި ބޭނުންނުކޮށް ހުރި ބައެއް ފަންގިލާތައް ވެސް ބޭނުންކުރެވޭ ގޮތަށް ހުޅުވުމަށް ފަހުގައެވެ. އެގޮތުން މީގެ ކުރިން އެ ހޮސްޕިޓަލުގެ 17 ވަނަ ފަންގިފިލާ އިން 19 ވަނަ ފަންގިފިލާ ބޭނުންނުކޮށް ހުރި ނަމަވެސް، މިހާރު އެ ހޮސްޕިޓަލްގެ 17 ވަނަ ފަންގިފިލާގައި 16 އެނދުގެ އެންއައިސީޔޫ އާއި 6 އެނދުގެ ޑެލިވަރީ ސުއިޓް އަދި 18 އާއި 19 ވަނަ ފަންގިފިލާގައި ވެސް 14 އެނދު ބަހައްޓައިގެން ޚިދުމަތް ދިނުމަށް ވަނީ ނިންމާފައެވެ.