ބ، އޭދަފުށީގައި 1،000 ފްލެޓް އެޅުމަށް ޗައިނާގެ ކުންފުންޏަކާއެކު، ރާއްޖޭގެ ސަރުކާރުން ސޮއިކޮށްފިއެވެ.

މިއަދު ރައީސް އޮފީހުގައި އޮތް ޚާއްސަ ރަސްމިއްޔާތެއްގައި، އޭދަފުށީގައި 1،000 ފްލެޓް އެޅުމަށް ސޮއިކުރީ ޗައިނާގެ ސައިންހައިޑްރޯ ކޯޕަރޭޝަން ލިމިޓެޑާ އެކުއެވެ. އެގޮތުން އެ އެއްބަސްވުމުގައ ސަރުކާރުގެ ފަރާތުން އިމާރަތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބު ސޮއިކުރެއްވިއިރު، ޗައިނާގެ ކުންފުނީގެ ފަރާތުން ސޮއިކުރެއްވީ އެ ކުންފުނީގެ ކަންޓްރީ މެނޭޖަރު ޕޭން ގުއަންޒޯ އެވެ.

އެ އެއްބަސްވުމުގެ ދަށުން އޭދަފުށިގައި 15 ބުރީގެ 12 ޓަވަރު އެޅުމަށް ނިންމާފައިވާއިރު، އެ ޓަވަރުތަކުގައި ތިން ކޮޓަރީގެ 336 ފްލެޓް އަދި ދެ ކޮޓަރީގެ 672 ފްލެޓް އެޅުމަށް ވަނީ ނިންމާފައެވެ.

އެގޮތުން އެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުއްތަލިބް ވިދާޅުވީ އޭދަފުށްޓަކީ ސަރުކާރުން ކަނޑައަޅާފައިވާ އާބަން ސެންޓަރަކަށް ވާއިރު، ވާޓިކަލް ޑެވެލޮޕްމަންޓަށް ދިޔުމަށް ސަރުކާރުން ނިންމީ، އެ ރަށުގެ ބިމުގެ ޖާގައި އޮތް ގޮތުންނާއި، ބިން އިތުރުކުރެވެން ނެތުމާއެކު އެކަމަކީ މުހިންމު ކަމެއްގެ ގޮތުގައި ފެންނާތީ ކަމަށެވެ.

[ވާޓިކަލް ޑެވެލޮޕްމަންޓަށް ދިޔުމަށް ނިންމީ] އޭދަފުއްޓަކީ ސަރުކާރުން ކަނޑަޅާފައިވާ އުރްބަން ސެންޓަރަކަށް ވުމާއި، އެރަށުގެ ބިން އެންމެ ހެޔޮ ގޮތުގައި ބޭނުން ކުރުމަށް އަޅުގަނޑުމެން ކުރަން ޖެހޭ މަސައްކަތުގެ ތެރެއިން ބިން އިތުރުކުރެވެން ނެތުމާއެކު، ވާޓިކަލް ޑެވެލޮޕްމެންޓް އަކީ މުހިންމު ކަމެއް ކަމަށް ގަބޫލުކުރެވޭތީ، - އިމާރަތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބު

ވަޒީރު އިތުރަށް ވިދާޅުވީ، އޭދަފުށްޓަކީ ވަށައިގެން ރިސޯޓުތައް ގިނަ ރަށަކަށް ވެފައި، ރައީސް ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް، ރިސޯޓުތަކުގައި މަސައްކަތްކުރާ ފަރާތްތަކަށް ރަށާއި ކައިރި ރިސޯޓުތަކުން ބޯހިޔާވަހިކަމުގެ ފުރުސަތު އެ ރަށުން ފަހިވާނެ ކަމަށެވެ. އަދި އެ ހުރިހާ ކަމެއްގެ ތެރެއިން އޭދަށުޓަކީ އާބަން ސެންޓަރަކަށް ވުމާއެކު، އެ ރަށަކީ އާބާދީ އާއި ތަރައްގީކުރުން އެއްފަސްކުރުމުގެ ނާރެހަކަށް ވާނެ ރަށެއް ކަމަށް ގަބޫލުފުޅުކުރައްވާ ކަމުގައި ވެސް ވަޒީރު ވިދާޅުވިއެވެ.