މިދިޔަ ސަރުކާރުން ކުރިއަށް ގެންދިޔަ ގެދޮރުވެރިޔާގެ ސްކީމުގެ ދަށުން މިދިޔަ ސަރުކާރުން ދޫކުރި ފްލެޓް ތަކުގެ ދާއިމީ ލިސްޓް އާންމުކުރުން އަނެއްކާ ވެސް ފަސްކޮށްފިއެވެ.

ހުސްވި އޮކްޓޯބަރު މަހުގެ ތެރޭގައި އާންމުކުރުމަށް އެންމެ ފުރަތަމަ ނިންމި އެ ލިސްޓު ނެރުން މި ފަހަރު ފަސްކޮށްފައިވަނީ ދެވަނަ ވަނަ ފަހަރަށެވެ. އެގޮތުން މިދިޔަ އޮކްޓޯބަރު މަހުގެ ފަހު ހަފުތާގެ ތެރޭގައި ނެރެން އޮތް ލިސްޓު އެ ދުވަހު އާންމު ނުކުރެވި، މި ހިނގާ ނޮވެމްބަރު މަހުގެ ދެވަނަ ހަފުތާގެ ތެރޭގައި އާންމުކުރާނެ ކަމަށް އޭރު ހައުސިން މިނިސްޓްރީން ބުންޏެވެ. އަދި އެކަމުގެ ޔަގީންކަން ގެދޮރުވެރިކަމާ ބެހޭ ވަޒީރު ޑރ. އަލީ ހައިދަރު ވެސް ދެއްވިއެވެ.

އެގޮތުން "މެންދުރު ޓީވީ" އަށް މީގެ ކުރިން ދެއްވި އިންޓަވިއުއެއްގައި ވަޒީރު ވަނީ، ދިމާވި ދަތިތަކާ އެކު ވެސް އެ ލިސްޓު ނެރުމުގައި ލަސްތަކެއް ކުރިމަތިވި ނަމަވެސް، މި ހިނގާ ނޮވެމްބަރު މަހުގެ ދެވަނަ ހަފުތާގައި އެ ލިސްޓު ނެރެވޭނެ ކަމުގެ ޔަގީންކަން އެބައޮތް ކަމުގައި ވިދާޅުވެފައެވެ.

އެހެން ނަމަވެސް މިއަދު ހައުސިން މިނިސްޓްރީން ނެރުނު ނޫސް ބަޔާނުގައި ބުނީ، އެ ސްކީމުގެ ވަގުތީ ލިސްޓު ރީއިވެލުއޭޓް ކުރުމަށް އިތުރު މުއްދަތު ބޭނުންވާ ކަމަށެވެ. އަދި އެކަމަށް އިތުރު މުއްދަތު ދިޔަ ނަމަވެސް، ސަރުކާރުގެ މަގްސަދަކީ އެ ފްލެޓްތައް ހޯދަން ހުށަހަޅާފައިވާ އެއްވެސް ފަރާތެއްގެ ހައްގު ނުގެއްލޭނެކަން ކަށަވަރުކުރުމާއެކު، އެ ސްކީމުގެ ދަށުން ދޫކުރާ ފްލެޓްތައް އޭގެ ހައްގުވެރިންނަށް ލިބޭނެކަން ކަށަވަރުކުރުން ކަމުގައި ވެސް އެ ބަޔާނުގައުި ބުންޏެވެ.

އެ ބަޔާނުގައި އެ ލިސްޓު ނެރޭނެ ވަކި ތާރީޚެއް ފާހަގަކޮށްފައިނުވެއެވެ.

ގެދޮރުވެރިޔާގެ ދަށުން ހުޅުވާލި ފުރުސަތުގައި މިދިޔަ ސަރުކާރުން ވަނީ ފުރަތަމަ 4،000 މީހުންނަށް ފްލެޓް ދިނުމަށް ނިންމައި، ދާއިމީ ލިސްޓެއް އެކުލަވާލައިފައެވެ. އެހެން ނަމަވެސް އެ ފްލެޓްތަކުގެ އެއްބަސްވުންތަކުގައި ސޮއިކުރަމުންދަނިކޮށް، އެ މަސައްކަތް ހުއްޓަން އެންޓި ކޮރަޕްޝަން ކޮމިޝަން (އޭސީސީ)އިން އަންގައި، އެ ލިސްޓުގެ މައްސަލަ ބަލަން އެ ކޮމިޝަނުން ފެށިއެވެ.

އެގޮތުން އޭސީސީން ހިންގި ތަހުގީގުގައި ބެލި ފޯމުތަކުން 59.6 އިންސައްތަ ފޯމުތަކަކަކީ ޝަރުތު ހަމަނުވާ ފޯމުތަކެއް ކަމަށް ބުނެފައިވެއެވެ. އެއާއެކު އެ ލިސްޓު އަލުން ބަލައި، ރިވިއުކުރުމުގެ މަސައްކަތް ހައުސިން މިނިސްޓްރީން ފެށިއެވެ.