މާލޭގެ ލޯކަލް މާރުކޭޓު މިހާރު ހިންގަމުންދާ ބިމުގައި ޒަމާނީ މާރުކޭޓު ކޮމްޕްލެކްސްއެއް ތަރައްޤީކުރުމުގެ މަސައްކަތް ސަރުކާރުން ބަޔަކާ ޙަވާލުކޮށްފިއެވެ.

މި މަޝްރޫޢު ޙަވާލުކޮށްފައިވަނީ ޓްރަސްޓެންގ މޯލްޑިވްސް ޕްރައިވެޓް ލިމިޓެޑާއެވެ.

Ad by Hajj Corporation

އިމާރާތް ކުރުމާއި ގެދޮރުވެރިކަމާ ބިނާރާ ބެހޭ ވުޒާރާގައި ބޭއްވި ރަސްމިއްޔާތެއްގައި މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ މުޙައްމަދު ޝާމިލްއެވެ. ޓްރަސްޓެންގ މޯލްޑިވްސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ މުޙައްމަދު ޢަބްދުލް ހާދީއެވެ.

މި މަޝްރޫޢުގެ ދަށުން ތަރައްޤީކުރާ މާރުކޭޓު ކޮމްޕްލެކްސް ބިނާކުރަނީ މާލެ މަސްމާރުކޭޓު ކުރިމަތިން މިހާރު ހިންގަމުން އަންނަ ލޯކަލް މާރުކޭޓު ހުރި ބިމުގައެވެ. ޖުމްލަ 6 ފަންގިފިލާއަށް އިމާރާތްކުރާ މި ކޮމްޕްލެކްސް ފަރުމާކޮށްފައިވަނީ ތަފާތު ޚިދުމަތްތަކަށް ޚާއްޞަ ފަންގިފިލާތަކެއް ހިމެނޭ ގޮތަށެވެ.

އެގޮތުން އިމާރާތުގެ ބޭސްމަންޓް ޕާކިންގއަށް ޚާއްޞަކޮށްފައިވާއިރު، ގްރައުންޑް ފްލޯ ޚާއްޞަކޮށްފައިވަނީ މަސްމާރުކޭޓަށެވެ. އިމާރާތުގެ ފުރަތަމަ، ދެވަނަ އަދި ތިންވަނަ ފަންގިފިލާ ތަރުކާރީ އާއި މޭވާ ވިއްކާ މާރުކޭޓަށް ޚާއްޞަކޮށްފައިވާއިރު، ހަތަރުވަނަ ފަންގިފިލާގައި ތަރައްޤީކުރުމަށް ހަމަޖެހިފައިވަނީ ފުޑް ކޯޓެކެވެ.

މި މަސައްކަތް ޓްރަސްޓެންގ މޯލްޑިވްސްއާ ޙަވާލުކޮށްފައިވަނީ 126,359,594.94 ރުފިޔާ އަށެވެ. މި މަޝްރޫޢު ނިންމުމަށް އެ ކުންފުންޏަށް ދީފައިވަނީ 1 އަހަރާއި 8 މަސް ދުވަހުގެ މުއްދަތެކެވެ.

ސަރުކާރުގެ އަމާޒަކީ މި މަޝްރޫޢު ނިމުމާއެކު، މާލޭގެ ބާޒާރުމަތީ ސަރަޙައްދުގައި މިހާރު ހިންގަމުންދާ ހުރިހާ މާރުކޭޓުތަކެއް މި އައު އިމާރާތަށް ބަދަލުކުރުމެވެ. މިއީ ބާޒާރުމަތީ ސަރަޙައްދު ތަރުތީބުކޮށް، ޚިދުމަތް ހޯދާ ފަރާތްތަކާއި ވިޔަފާރިވެރިންނަށް ލުއިފަސޭހަ މާޙައުލެއް ޤާއިމުކުރުމަށް ސަރުކާރުން ކުރަމުންދާ މަސައްކަތުގެ މުހިންމު ބައެކެވެ.