ދިވެހި ގައުމިއްޔަތު ދިރުވައި އާލާކުރުމުގެ ސަބަބުން ދިވެހިންގެ ފަސްގަނޑާއި ދިވެހިންނާއި ދިވެހި ދައުލަތް ރައްކާތެރިކުރުމުގެ ޢިލްމީ ފިކުރު ދިވެހިންގެ ވިސްނުމުގައި އަށަގަނެވިގެންދާނެ ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެ އެވެ.

ދިވެހި ޤައުމިއްޔަތުގެ އިސްވަރުގެ އޮފީސް ހުޅުވުމާސް މިއަދު ބޭއްވި ރަސްމިއްޔާތުގައި މެޑަމް ސާޖިދާ ވިދާޅުވީ ދިވެހި ގައުމުގައި އޮންނަނީ ދިވެހި ގައުމިއްޔަތާއި ދިވެހީން ގަބޫލުކުރާ ގޮތްތަކާއި ހަމަތައް، ދިވެހި ދަރީންގެ ގައުމީ ވިސްނުން ބިނާވާންޖެހޭ އަސާސްތައް ކަމަށެވެ. އިލްމީ ގޮތުން ދިވެހި ގައުމާ އެއްކޮޅަށް ވިސްނަން އެނގޭކަހަލަ އަމިއްލަ ނަފްސާއި އަމިއްލަ ޤައުމަށް ގަދަރުކުރަން އެނގޭ ޖީލެއް ބިނާވުމުގެ މަގުތައް ހުޅުވިގެންދާނެ ކަމަށް ރައީސުލްޖުމްހޫރިއްޔާގެ އަނބިކަނބަލުން ވިދާޅުވި އެވެ.

އެކަމަނާ ވިދާޅުވީ ގައުމިއްޔަތު ދިރިގެން އައުމަކީ ދިވެހިންނަށް ދިވެހީންގެ އަމިއްލަ ބަހާ ސަގާފަތާ އާދަކާދައާއި އަގުތައް މޭރުންވުން ކަމަށެވެ. އަދި ގައުމިއްޔަތު ދިރިގެން އައުމަކީ ދިެވެހިންނަކީ ތަހުޒީބު ހަރުދަނާ ވިސްނުންތެރި ބަޔަކު ކަމުގައިވުން ކަމަށާ ދިވެހިންގެ ފަސްގަނޑާ ދިވެހި ދައުލަތުގެ ދެމިތިބުން ކަށަވަރުކުރުމުގެ އިލްމީ ފިކުރު ދިވެހީންގެ ވިސްނުމުގައި ހަރުލަމުން އަށަގަންނަމުން އެކަމަށް އަހުލުވެރިވަމުން ދިއުން ކަމަށެވެ.

ދިވެހި ޤައުމިއްޔަތަކީ އިސްލާމްދީނާއި މާދަރީ ބަހާއި ސަގާފަތާއި އާދަކާދަ ކަމަށްވާއިރު ދިވެހި ޤައުމިއްޔަތު ދިރުވިގެންދިއުމަކީ މާތްވެގެންވާ އިސްލާމް ދީނުގެ އަޚްލާގީ ގަހަނާއިން ދިވެހިން އިތުރަށް ޒީނަތްތެރިވެގެންދިއުން ކަމަށް ރައީސުލްޖުމްހޫރިއްޔާގެ އަނބިކަނބަލުން ވިދާޅުވި އެވެ. އަދި މީގެ ސަބަބުން ދިވެހިންނަކީ ތަހުޒީބީ ހަރުދަނާ އަދި ވިސްނުންތެރި ބަޔަކަށް ވެގެންދާނެކަމަށްވެސް އެކަމަނާ ވިދާޅުވިއެވެ.

ރައީސުލްޖުމްހޫރިއްޔާގެ އަނބިކަނބަލުން މިއަދު ވަނީ ދިވެހި ގައުމިއްޔަތުގެ އިސްވަރުގެ އޮފީސް ހުޅުއްވައިދެއްވާ އެތަނުގެ މަސައްކަތްތައް އޮޅުންފިލުވާލައްވާފަ އެވެ.