އެމެރިކާގެ ހަތިޔާރު ބޭނުންކޮށްގެން ރަޝިއާއަށް ހަމަލާދިނުމުގެ ހުއްދަ އެމެރިކާގެ ރައީސް ޖޯ ބައިޑެން، ޔުކްރެއިންއަށް ދެއްވައިފި.

2022 ވަނަ އަހަރު ފެށި ރަޝިޔާ-ޔޫކްރެއިން ހަނގުރާމައިގައި ޔޫކްރެއިންގެ އެންމެ ބޮޑު މަދަދުގާރަކީ އެމެރިކާއާއި ނޭޓޯއެވެ. ޔޫކްރެއިނަށް އެންމެ ގިނަ އަދަދެއްގެ ހަތިޔާރު ފޯރުކޮށްދެނީވެސް އެމެރިކާއިންނެވެ.

Ad by Hajj Corporation

ނަން ހާމަކުރަން ބޭނުންނުވާ އެމެރިކާގެ ދެ މަސްއޫލުވެރިއަކު ބޭރުގެ ނޫސްތަކަށް ވިދާޅުވިގޮތުގައި އެމެރިކާއިން ހުއްދަ ދީފައިވަނީ ދުރުރާސްތާގެ މިސައިލް ބޭނުންކޮށްގެން ރަޝިއާއަށް ހަމަލާދިނުމުގެ ހުއްދައެކެވެ. މިއާއެކު ރަޝިއާގެ ޤާނޫނޫ ހަދާ މަޖިލީހުގެ ބައެއް މެންބަރުންވަނީ ޔުކްރެއިނުން ހުޅަނގުގެ ހަތިޔާރު ބޭނުންކޮށްގެން ރަޝިއާގެ އެތެރެއަށް ހަމަލާދޭންފަށައިފިނަމަ ރަޝިއާއާއި އެމެރިކާއާ ދެމެދު ސީދާ އަސްކަރީ ކުރިމަތިލުމެއް ހިނގައިފާނެކަމުގެ އިންޒާރު ދެއްވާފައެވެ.

މި ކަމުގެ ހުއްދަ، އެމެރިކާގެ ރައީސް ޖޯ ބައިޑަން ޔޫކްރެއިނަށް ދީފައި މި ވަނީ، އޭނާގެ ވެރިކަން ނިމުމަކާ ގާތްވެފައިވާ ދަނޑިވަޅެއްގައެވެ. ނޮވެންބަރު 5ވަނަ ދުވަހު އެމެރިކާގައި ބޭއްވި ރިޔާސީ އިންތިޚާބު ކާމިޔާބު ކުރައްވާފައި ވަނީ އިދިކޮޅު ރިޕަބްލިކަން ޕާޓީގެ ކެނޑިޑޭޓު، ކުރީގެ ރައީސް ޑޮނަލްޑް ޓްރަމްޕެވެ. އޭނާއަކީ ރަޝިޔާ-ޔޫކްރެއިން ހަނގުރާމައިގެ އިތުރުން އެމެރިކާއިން ޔޫކްރެއިނަށް ހަތިޔާރު ފޯރުކޮށްދިނުމާ ދެކޮޅު ބޭފުޅެކެވެ. އަދި، އޭނާގެ ވެރިކަމުގައި ޔޫކްރެއިނަށް ހަތިޔާރު ފޯރުކޮށްދިނުން ހުއްޓައިލުން، ނުވަތަ ހަތިޔާރު ފޮނުވާ މިންވަރު މަދު ކުރުމަކީ އެކަށީގެންވާ ކަމެއް ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.

2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ފެށި ހަނގުރާމައިގެ ތެރެއިން ރަޝިޔާގެ ފައުޖުތަކުން ވަނީ ޔޫކްރެއިންގެ ބިމުން ބަޔަކަށް އަތްގަދަ ކޮށްފައެވެ. އޭގެ ތެރޭގައި, އިރުމަތީ ދޮންބާސްގެ %80އާއި, ދެކުނުގައި އޮތް ޒަޕޮރީޜިޔާއާއި ޚަރްސަންގެ %70 ހިމެނެއެވެ. ޔޫކްރެއިންގެ އެންމެ ދެކުނުން އޮތް ކްރައިމިޔާއަށް ރަޝިޔާއިން އަތްގަދަ ކޮށްފައި ވަނީ 2014ވަނަ އަހަރުއެވެ.