ރާއްޖޭގައި ނަން މަޝްހޫރުވެގެން މުޖްތަމައުގެ ކުށްތަކަށް އަރައިގަންނަމުން އަންނަ ގޭންގުތަކުގެ ކަންކަން އެއްކޮށް ހުއްޓުވާނެކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.

މި ސަރުކާރަށް އެއް އަހަރުފުރުމާއި ގުޅިގެން، އަމިއްލަ ޓީވީ ޗެނަލެއްކަމަށްވާ އެސްއެސް ޓީވީއަށް ދެއްވި ހާއްސަ ބަސްދީގަތުމެއްގައި މިނިސްޓަރު ވިދާޅުވެފައި ވަނީ ރާއްޖޭގައި ހަރަކާތްތެރިވާ ގޭންގްތައް މަދު ނޫން ކަމަށެވެ. އަދި ރާއްޖޭގައި ނަން މަޝްހޫރުވެގެން މުޖްތަމައުގެ ކުށްތަކަށް އަރައިގަންނަމުން އަންނަ ގޭންގުތަކުގެ ކަންކަން އެއްކޮށް ހުއްޓުވާނެކަމަށް ވިދާޅުވިއެވެ.

މިނިސްޓަރު ވަނީ ގޭންގުތައް ހުއްޓުވޭނޭ ކަމުގެ 100 ޕަސެންޓް ޔަގީންކަން ލިބިފައިވާކަމަށް ވެސް ވިދާޅުވެފައެވެ. އަދި ގޭންގްތައް ހުއްޓުވުމުގެ ގާބިލުކަން އަދުގެ ރައީސުލްޖުމްހޫރިއްޔާގެ އެބަހުރި ކަމަށް ވެސް ވިދާޅުވިއެވެ.

މި ރިޔާސީ ދައުރުގެ ފުރަތަމަ 52 ހަފްތާގައި ހޯމް ޓީމުން ހާސިލްކޮށްފައިވާ މުހިންމު ނަތީޖާތަކާއި ގުޅޭގޮތުން ވާހަކަ ދައްކަވަމުން ވެސް މިނިސްޓަރު ވަނީ ގޭންގްތަކުގެ މައްސަލާގައި ރައްޔިތުން ހިތްހަމަޖެހޭ މިންވަރަށް ސަރުކާރުން ހައްލު ހޯދެއްވާނެ ކަމަށް ވިދާޅުވެފައެވެ.

''މާތްﷲގެ ވާގިފުޅުން، މިރިޔާސީ ދައުރު ނިމުމުގެ ކުރިން އެމައްސަލަތަކަށް، ރައްޔިތުން ހިތްހަމަޖެހޭ މިންވަރަށް ސަރުކާރުން ހައްލު ހޯދައިދޭނަން. މި މަސައްކަތުގައި، ގޭންގު ކުށްތައް ކުރާ މީހުންނަށް ހަރުކަށި އަދަބުދީ، ކުށުގެ ޒަރިއްޔާއިން ހޯދާފައިވާ މުދަލާއި ތަކެތި ދައުލަތަށް ނެގުމަށް އެކަށައަޅަން ޖެހޭ ޤާނޫނީ އޮނިގަނޑު ވުޖޫދަށް ވަނީ ގެނެވިފަ. އެބިލު، ޤާނޫނަކަށްވެ، ތަންފީޛް ކުރަން ފެށުމުން، ގޭންގުތަކުގެ ހަރަކާތްތައް ހުއްޓި، ރައްޔިތުންނަށް ހިތްހަމަޖެހުމާއި އުފަލާއިއެކު ދިރިއުޅެވޭނެ'' މިނިސްޓަރު ވިދާޅުވެފަވެއެވެ.