ކުރިއަށް އޮތް ރިޔާސީ އިންތިހާބުގެ އެމްޑީޕީގެ ޕްރައިމަރީގައި ވާދަކުރައްވާނެކަން އެ ޕާޓީގެ ޗެއާޕާސަން، ފައްޔާޒް އިސްމައީލް އިއުލާންކުރައްވައިފިއެވެ.

ފައްޔާޒް އެކަން އިއުލާންކުރެއްވީ އެމްޑީޕީގެ ގައުމީ މަޖިލިސްގެ ވަޓްސްއެޕް ގްރޫޕަށް ފޮނުއްވި މެސެޖެއްގައެވެ.

Ad by Hajj Corporation

ކުރީގެ އިގްތިސާދީ ވަޒީރުކަން ވެސް ކުރެއްވި ފައްޔާޒުގެ އެ މެސެޖުގައި ވިދާޅުވީ، 2028 ގެ ރިޔާސީ އިންތިހާބުގެ ޕްރައިމަރީގައި ވާދަކުރައްވާނެ ކަމަށާއި، އެކަމަށް އެ ޕާޓީގެ ބޭފުޅުން ސަޕޯޓުކޮށްދިނުމަށެވެ. ފައްޔާޒުގެ އެ މެސެޖަށް އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވަނީ އެއީ ރަނގަޅު ނިންމުމެއް ކަމުގައި ވިދާޅުވެ، ތާއީދުކުރައްވާފައެވެ.

2028 ގެ ރިޔާސީ އިންތިހާބުގައި ފައްޔާޒު ވާދަކުރައްވާނެކަން އިއުލާންކުރައްވާފައިވާއިރު، އެ އިންތިހާބުގައި ފައްޔާޒު ވާދަކުރައްވަން އުޅުއްވާކަމުގެ އަޑުތަކެއް މީގެ ކުރިން ވެސް ވަނީ ފެތުރިފައެވެ. އެގޮތުން ފައްޔާޒުގެ އިތުރުން، އެ ޕާޓީގެ ފަރާތުން ރިޔާސީ އިންތިހާބުގެ ޕްރައިމަރީގައި ވާދަކުރައްވާނެ ކަމަށް ޝައުގުވެރިކަން ފާޅުކުރައްވާފައިވާކަމަށް އަޑު ފެތުރޭ ބޭފުޅުންގެ ތެރޭގައި މިހާރުގެ މާލެ ސިޓީ ކައުންސިލުގެ މޭޔަރު އާދަމް އާޒިމް އަދި ކުރީގެ ޚާރިޖީ ވަޒީރު އަބްދުﷲ ޝާހިދު ހިމެނިވަޑައިގަންނަވައެވެ.

އެހެން ނަމަވެސް އެކަން އޭގެ ތެރެއިން މިހާތަނަށް ރަސްމީކޮށް އިއުލާންކުރެއްވީ ފައްޔާޒު އެކަންޏެވެ.