މެންޗެސްޓަރ ސިޓީގެ ކޯޗް ޕެޕް ގުއާޑިއޯލާގެ ކޯޗިންގ ކެރިއަރުގައި ފުރަތަމަ ފަހަރަށް ވިދިވިދިގެން 5 މެޗް ބަލިވެއްޖެއެވެ. އެގޮތުން މެންޗެސްޓަރ ސީޓީ އެންމެ ފަހުން ލީގުގައި ކުޅުނު ތިން މެޗުންނާއި ޗެންޕިއަންސް ލީގުގައި އެންމެ ފަހުން ކުޅުނު މެޗުންނާއި ލީގު ކަޕްގައި ކުޅުނު މެޗުން އެޓީމުވަނީ ބަލިވެފައެވެ. އިއްޔެ މެންޗެސްޓަރ ސިޓީގެ އަމިއްލަ ދަނޑުގައި ކުޅުނު މެޗުން މެންސިޓީ ބަލިވީ 4-0 ގެ ތަފާތު ބޮޑު ނަތީޖާއަކުން ޓޮޓްނަމް އާއި ދެކޮޅަށެވެ. މި މެޗާއެކު ސިޓީގެ އަމިއްލަ ދަނޑުގެ 52 މެޗުގެ އަންބީޓަން ރެކޯޑް ވެސް ނިމުމަކަށް އައިސްފައިވެއެވެ. އެންމެ ފަހުން ސިޓީ އަމިއްލަ ދަނޑުގައި ބަލިވެފައިވަނީ 2022 ވަނަ އަހަރުގެ ނޮވެމްބަރު 12 ވަނަ ދުވަހު ބްރެންޓްފޯޑާއި ދެކޮޅަށް 2-1 އިންނެވެ.އިއްޔެގެ މެޗުގައި ޓޮޓެންހަމްގެ ފުރަތަމަ ގޯލު ޖޭމްސް މެޑިސަން ވަނީ މެޗުގެ 13 ވަނަ މިނެޓުގައި ޖަހާފައެވެ. އޭނާ ދެވަނަ ގޯލު ޖެހީ އޭގެ 7 މިނެޓު ފަހުންނެވެ. ޓޮޓެންހަމްގެ ތިންވަނަ ގޯލު ޕެޑްރޯ ޕޯރޯ ވަނީ ޖަހާފައެވެ. އަދި އިންޖަރީ ޓައިމްގައި ބްރެނަން ޖޮންސަން ވަނީ ހަތަރުވަނަ ގޯލު ޖަހާފައެވެ.މި ބަލިވުމަކީ ޕެޕް ގުއާޑިއޯލާގެ ކޯޗިންގ ކެރިއަރުގައި އަމިއްލަ ދަނޑުގައި ލީގު މެޗެއްގައި އެންމެ ބޮޑު ސްކޯއަކުން ބަލިވި މެޗެވެ. މީގެ ކުރިން އޭނާގެ ޓީމެއް އަމިއްލަ ދަނޑުގައި 4 ގޯލުން ބަލިވެފައިވަނީ 2014 ވަނަ އަހަރުގެ އޭޕްރީލް މަހު ޗެމްޕިއަންސް ލީގުގައި ބަޔާން ކޯޗަކަށް ހުރިއިރު ރެއާލް މެޑްރިޑާދެކޮޅަށެވެ.

މި ބަލިވުމާއެކު މެންޗެސްޓަރ ސިޓީ ވަނީ ވިދިވިދިގެން 5 މެޗް ބަލިވެފައެވެ. މިއީ ޕެޕް ގުއާޑިއޯލާގެ ކޯޗިންގ ކެރިއަރުގައި އެންމެ ގިނަ މެޗް ވިދިވިދިގެން ބަލިވި ރެކޯޑެވެ. މީގެ ކުރިން ސިޓީ މިއަށްވުރެ ގިނަ މެޗް ވިދިވިދިގެން ބަލިވެފައިވަނީ 2006 ވަނަ އަހަރުގެ މާރިޗު އަދި އޭޕްރީލް މަހުގައެވެ. އެއީ ވިދިވިދިގެން 6 މެޗެވެ. އޭގެ ތެރެއިން 5 ވަނަ މެޗުގައި ބަލިވެފައިވަނީ ވެސް ޓޮޓްނަމްއާއި ދެކޮޅަށެވެ.މިހާރު ސިޓީ ވަނީ ލީގުގެ އެއްވަނައިގައި އޮތް ލިވަރޕޫލާ 5 ޕޮއިންޓުގެ ފަރަގެއްގައެވެ. އެގޮތުން މިރޭ ކުޅޭ މެޗުގައި ލިވަރޕޫލް ސައުތުހެމްޕްޓަން ބަލިކޮށްފިނަމަ މި ތަފާތު 8 ޕޮއިންޓަށް އިތުރުވާނެއެވެ.