އިއްޔެ ބޮޓްސްވާނާ އިންޓަނޭޝަނަލް ބެޑްމިންޓަން ސީރީޒް ސީރީޒްގެ މިކްސްޑް ޑަބަލްސް ކެޓަގަރީގެ ފައިނަލުގައި އަޒަރްބައިޖާންގެ ޕެއަރ އެއްކަމުގައިވާ އީރާ މަފްތޫހާ އާއި އަގީލް ގަބިލޯވް އާއި ވާދަކޮށް ރާއްޖޭގެ ހުސައިން ޒަޔާން ޒަކީ އާއި ފާތިމަތު ނަބާހާ އަބްދުރައްޒާގްގެ ޕެއާއިން ރިހި މެޑަލް ހޯދައިފި އެވެ.

މި މުބާރާތުގެ ފައިނަލަށް ރާއްޖޭގެ ޕެއަރ ދަތުރުކުރީ ސެމީގައި އަޒަރުބައިޖާންގެ ޕެއައެއް ކަމަށްވާ ހާޖަރ އާއި ޖާހިދު ބަލިކޮށްފައެވެ.

ފައިނަލް މެޗުގައި ރާއްޖޭގެ ޕެއަރ ބަލިވީ ސީދާ ދެ ސެޓުންނެވެ. މެޗު ފެށިގެން ވާދަވެރިކުޅުމެއް ފެނުނު ފުރަތަމަ ސެޓު އަޒަރުބައިޖާންގެ ޕެއަރ ކާމިޔާބުކުރީ 23-21 އިންނެވެ. އަދި ދެވަނަ ސެޓު އެޓީމުން ކާމިޔާބުކުރީ 21-18 އިންނެވެ.

މި މުބާރާތުގެ ޑަބަލްސް ޕެއަރ ގެ ފައިނަލުން ބަލިވެ ރިހި މެޑަލް ލިބުނަސް މި މުބާރާތުގެ ސިންގަލް އިވެންޓުން ނަބާހާ ވަނީ ރަން މެޑަލް ހޯދާފައެވެ. ފައިނަލުގައި ނަބާހާ ވާދަކޮށްފައިވަނީ އޭނާގެ ކޮށްކޮ ނަބީހާ އާއި ދެކޮޅާށެވެ.

މި މުބާރާތުގައި ރާއްޖޭގެ ޓީމުން ބައިވެރިވީ ރިވައިވަލް ސްޕޯރޓްސް ގެ ނަމުގައެވެ.