ގޯލްޑް ކަޕް ގައި ގްރޫޕް ޑީ ގައި އަލިފުށި ނައިފަރާއި ވާދަކޮށް މޮޅުވެއްޖެއެވެ. މި މެޗުން އަލިފުށި މޮޅުވީ 2-0 އިންނެވެ. މި މެޗުން އަލިފުށި މޮޅުވުމާއެކު ލިބުނި 3 ޕޮއިންޓާއެކު އެ ޓީމުވަނީ ގްރޫޕް ޑީ ގެ ތާވަލުގެ އެއްވަނައަށް އަރާފައެވެ. އަދި އަލިފުށިވަނީ މި މޮޅާއެކު މުބާރާތުގެ ދެވަނަ ބުރަށް ދަތުރުކޮށްފައެވެ.

ރޭގެ މެޗަށް ނިކުތްއިރު މި މުބާރާތުގައި އަލިފުއްޓާއި ނައިފަރު މީގެ ކުރިން ކުޅުނުމެޗުން ވަނީ މޮޅުވެފައެވެ. އެގޮތުން އަލިފުށި މޮޅުވެފައިވަނީ ކެންދޫއަތުންނެވެ. އަދި ނައިފަރު މޮޅުވެފައިވަނީ މާފުއްޓާއި ވާދަކޮށެވެ.

މެޗުފެށިގެން އަލިފުށިން މޮޅުކުޅުމެއް ކުޅުނު މި މެޗުގައި އަލިފުށީގެ ފުރަތަމަ ގޯލުޖެހީ ފުރަތަމަ ހާފުގެ ފަހުވަޤުތުގައެވެ. މި ގޯލަކީ އާދަމް އިމްރާން ޕެނަލްޓީ އޭރިޔާ ބޭރުން ޖެހި ބާރު ޝޮޓަކުން ޖެހި ގޯލެކެވެ. އަލިފުށީގެ ދެވަނަ ގޯލަކީ މެޗުގެ 81 ވަނަ މިނެޓުގައި ޖެހިގޯލެކެވެ. މި ގޯލުވެސް ޖަހައިދިނީ އިމްރާނުއެވެ.

ރޭގެ މެޗުގައިވެސް ފުރަތަމަ މެޗެކޭ އެއްގޮތަށް އަލިފުށީގެ ގިނައަދަދެއްގެ ސަޕޯޓަރުން ދަނޑަށްވަދެ، މުޅި ދަނޑު ގުގުމާލާފައެވެ.

ރޭގެ މެޗުން ބަލިވި ނައިފަރު އޮތީ ގްރޫޕް ޑީ ގެ ތާވަލުގެ ދެވަނައިގައެވެ. އަދި މި ގްރޫޕްގެ ފުލުގައި އޮތީ މާފުއްޓާއި ކެންދޫއެވެ. މި ދެޓީމު ބައްދަލުކުރާމެޗު މާދަމާ ހަވީރު ކުޅެވޭނެއެވެ.