ސަރުކާރުން އެއްވެސް މީހަކު އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ ކަމަށާ ރާއްޖޭގެ ޤާނޫނުތަކާއި ޤަވާއިދުތަކުގެ އިމުގެތެރޭގައި ހިޔާލުފާޅުކުރެވޭނެ އެންމެ ފުޅާމިނަށް އެކަން ކުރެވޭނެ މަގު އަބަދުވެސް އޮންނާނެ ކަމަށް ދާހިލީ ސަލާމަތާއި ފަންނިޔަތާއި ބެހޭ ވަޒީރު އަލީ އިހުސާން މިއަދު ވިދާޅުވެއްޖެ އެވެ.

މިނިސްޓަރ އިހުސާން މިހެން ވިދާޅުވީ އެމްޑީޕީގެ ސިޔާސީ އެކްވިސްޓަކު އެކްސްގައި ކުރި ޕޯސްޓަކާއި ގުޅިގެން އޭނާ ފުލުހަށް ހާޒިރުވާން އެންގުމާއި ގުޅިގެން އެމްޑީޕީގެ އެމްޑީޕީގެ ޗެއާޕާސަން ފައްޔާޒް އިސްމާއީލް އެކްސްގައި ކުރި ޕޯސްޓަކާއި ގުޅިގެންނެވެ.

އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެފައިވަނީ ޓްވީޓު ކުރާތީ ފުލުސް އޮފީހަށް ހާޒިރުވާން ޝާފިއު އަށް އަންގައިފި ކަމަށެވެ. ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށެވެ. އަދި ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށާ ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ. ކަމަށް ފައްޔާޒު ވިދޅާުވެފައިވެ އެވެ. މީގެ އިތުރުން ހިޔާލާއި ފިކުރުގައި ތަޅެއް ނޭޅުވޭނެ. ކަމަށާ މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ ކަމަށްވެސް ފައްޔާޒު ވިދާޅުވި އެވެ.

ފައްޔާޒުގެ ޕޯސްޓަށް ރައްދު ދެއްވާ ދާހިލީ ވަޒީރު އިހުސާން ވިދާޅުވީ އެ ޕޯސްޓުގައި ލިޔެފައި އޮތީ “މަށަށް ކަލޭ މަގެއްމަތިން ނުފެއްނާތި!” މިހެން ކަމަށެވެ. މި ޖުމްލައިން ކޮންމެވެސް މީހަކަށް ނިސްބަތްކޮށް އެމީހަކު މަގެއްމަތިން ފެނިއްޖެނަމަ އެމީހަކަށް ޖިސްމާނީގޮތުން ގެއްލުމެއް ދީފާނެކަމަށް ދޭހަވާގޮތަށް އޮތުމުން މިކަމުގެ ތަފްސީލު ހޯދާ މިކަން ސާފުކުރުމަކީ ކަމާބެހޭ އިދާރާތަކުން ކޮންމެހެން ކުރަންޖެހޭކަމެއް ކަމަށް ވަޒީރު ވިދާޅުވި އެވެ.މާދަމާ މީހަކު މިފަދަ އިބާރާތެއް ފައްޔާޒުއަށް ނިސްބަތްކޮށް ނުވަތަ ދޭހަވާގޮތަށް ބުނެފިނަމަ އެއީ ހިޔާލުފާޅުކުރީކަމަށް ބަލާ އަޅާނުލާ ތިބެންވީތޯ އަދި އެހެން ތިއްބާ މަނިކުފާނު މަގެއްމަތިން ފެނި ޖިސްމާނީ އަނިޔާއެއް ދީފިނަމަ އެއީ ފާޅުކުރި ހިޔާލު އިތުރަށް ސާފުކޮށްދިނީކަމަށް ބަލާ އަޅާނުލާ ތިބެންވީތޯ މިނިސްޓަރ ފައްޔާޒުއާއި ސުވާލުކުރެއްވި އެވެ.

މީގެ އިތުރުން މިއީ ފައްޔާޒުގެ ޒައާމަތެއްގައި މިގައުމުގައި ކަންކަން އޮންނާނެގޮތްތޯ މިނިސްޓަރ ސުވާލުކުރެއްވި އެވެ. މިނިސްޓަރ މިފަދައިން ވިދާޅުވި އިރު އެމްޑީޕީގެ ރިޔާސީ ޓިކެޓުގައި 2028 ވަނަ އަހަރު ރިޔާސީ އިންތިހާބުގައި ވާދަކުރެއްވުމަށް ފައްޔާޒު ވަނީ ނިންމާފަ އެވެ.މިނިސްޓަރ އިހުސާން އިތުރަށް ވިދާޅުވީ މިސަރުކާރުގައި އެއްވެސް މީހަކު އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ ކަމަށެވެ. ހަމައެއާއެކު ރާއްޖޭގެ ޤާނޫނުތަކާއި ޤަވާއިދުތަކުގެ އިމުގެތެރޭގައި ހިޔާލުފާޅުކުރެވޭނެ އެންމެ ފުޅާމިނަށް އެކަން ކުރެވޭނެ މަގު އަބަދުވެސް އޮންނާނެ ކަމަށް މިނިސްޓަރ ވިދާޅުވި އެވެ.ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ވަރަށް ގައިރު ޒިންމާދާރު ކަމެއް ކަމަށް މިނިސްޓަރުގެ ޕޯސްޓު ނިންމާލައްވަމުން ވިދާޅުވެފައިވެ އެވެ.