ރައްޔިތުންގެ މަޖިލީހުގެ އިދާރާގެ އެންމެ އިސް ތިން ބޭފުޅުން އެ ބޭފުޅުންގެ މަގާމުތަކުގައި އިތުރު ދައުރެއް ފުރިހަމަ ކުރެއްވުމުގެ ކުރިން އަހުދުގެ ލިޔުމުގައި ސޮއިކުރައްވައިފިއެވެ.

މަޖިލީހުގެ އަމީން އާންމު ފާތިމަތު ނިއުޝާ އާއި ކައުންސެލް ޖެނެރަލް ފާތުމަތު ފިލްޒާ އަދި މަޖިލީހުގެ ސާޖެންޓް އެޓް އާމްސް ތަލްހަތު ހަސަން މަގާމުގެ އަހުދުގައި ސޮއިކުރެއްވީ މިއަދު މަޖިލީހުގައި ބޭއްވި ހަފްލާއެއްގައެވެ.

Ad by Hajj Corporation

މި ހަފްލާގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ބައިވެރިވެވަޑައިގެންނެވިއެވެ.

ރައްޔިތުންގެ މަޖިލިސް އިދާރާގެ އެންމެ އިސް ތިން މަގާމުކަމަށްވާ އަމީންއާއްމާއި، ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމުގައި މިހާރުވެސް ތިއްބެވި އެ ބޭފުޅުންގެ މަގާމުތައް ދަމަހައްޓަން މަޖިލީހުގެ އިއްތިފާގުން ފާސްކުރީ ނޮވެމްބަރުމަހުގެ 25 ވަނަ ދުވަހުއެވެ.

އެދުވަހު މަޖިލީހުގެ ޖަލްސާގައި ނެގި ވޯޓުގައި އަމީންއާއްމު، ނިއުޝާގެ މަގާމު ދަމަހައްޓަން 79 މެންބަރުންގެ އިއްތިފާގުން ވަނީ ފާސްކޮށްފައެވެ.

އަދި ކައުންސެލް ޖެނެރަލް، ފިލްޒާގެ މަގާމު ދަމަހައްޓަން 80 މެންބަރުންގެ އިއްތިފާގުން ފާސްކޮށްފައިވާއިރު ސާޖެންޓް އެޓް އާމްސް، ތޮލްހަތުގެ މަގާމު ދަމަހައްޓަން 80 މެންބަރުންގެ އިއްތިފާގުން ވަނީ ފާސްކޮށްފައެވެ.

މަޖިލީހުގެ ގަވާއިދު ބުނާ ގޮތުގައި އެ ގަވާއިދަށް އަމަލުކުރަން ފަށާތާ ދެ ދައުރު ހަމަވުމުގެ ކުރިން މަޖިލީހުން އެހެން ގޮތަކަށް ކަނޑަނާޅާހާ ހިނދަކު ހިނގަމުންދާ މަޖިލީހުގެ އަމީންއާންމާއި މަޖިލީހުގެ ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމަށް މީހުން އައްޔަންކުރަންވާނެ ކަމަށެވެ.