ތައިލެންޑުގައި ހުންނަވާ ދިވެހި ސަފީރަކަށް، ފުއާދު ތައުފީގް އައްޔަންކުރަން ފެންނަކަމަށް ރައްޔިތުންގެ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީން މިއަދު ފާސްކޮށްފި އެވެ.

އިލެކްޝަން ކޮމިޝަން (އީސީ)ގެ ކުރީގެ ރައީސް ފުއާދު، ސަފީރު ކަމަށް އައްޔަން ކުރަން މަޖިލީހަށް ފޮނުވާފައިވަނީ 25 ވަނަ ދުވަހު އެވެ.

ހާރިޖީ ގުޅުންތަކާ ބެހޭ ކޮމިޓީގެ މިއަދުގެ ބައްދަލުވުމުގައި ފުއާދު އެ މަގާމަށް އައްޔަނުކުރަން ފެންނަކަމަށް ނިންމީ ކޮމެޓީގެ މެމްބަރުންގެ އިއްތިފާގުންނެވެ.

ދެންއޮންނާނީ ތައިލެންޑުގައި ހުންނަވާ ދިވެހި ސަފީރަކަށް، ފުއާދު އައްޔަނުކުރަން ފެނޭތޯ މަޖިލީހުގެ ތަޅުމުގައި ވޯޓު ނެގުމުގެ މަރުހަލާއެވެ.

ފުއާދަކީ ސްޓެޓިސްޓިކްސްގެ ދާއިރާއިން ތައުލީމު ހާސިލުކުރެއްވުމަށްފަހު އެކި ދާއިރާތަކުގައި ސަރުކާރަށާއި ދައުލަތަށް ގިނަ ދުވަހު ހިދުމަތް ކުރައްވާފައިވާ ބޭފުޅެކެވެ. ދެ ފަހަރެއްގެ މަތިން އިލެކްޝަންސް ކޮމިޝަނުގެ ރައީސްކަން ފުއާދުވަނީ ކުރައްވާފަ އެވެ.